မိုင်းရူပ၊ ဧပြီ ၉ ရက်၊ လားရှိုး
ရှမ်းမြောက် လားရှိုးမြို့သိမ်းတိုက်ပွဲမှာ ပြည်သူ့လွတ်မြောက်ရေးတပ်မတော် PLA အနေနဲ့ စစ်ရေးအတွေ့အကြုံ များစွာရခဲ့ပြီး ကိုးကန့်တပ်မတော် ကိုးကန့်တပ် MNDAA အနေနဲ့ လားရှိုးကနေ ဆုတ်ခွာရင် လူထုတွေအတွက် အကောင်းဆုံး ပြင်ဆင်ပေးမယ်လို့ ယုံကြည်ကြောင်း PLA ရဲ့ အထွေထွေအတွင်းရေးမှူး ရဲဘော်နီနီကျော်က ရွှေဖီမြေကို ပြောပါတယ်။
တရုတ်ရဲ့ ကြားဝင်စေ့စပ်မှုကြောင့် ဧပြီလ နောက်ဆုံးအပတ်မှာ ကိုးကန့်တပ်က လားရှိုးကနေ ဆုတ်ခွာရမယ်လို့ သတင်းတွေ ထွက်ပေါ်နေတဲ့အပေါ် လားရှိုးမြို့သိမ်းတိုက်ပွဲမှာ ပါဝင်တိုက်ခိုက်ခဲ့တဲ့ PLA က အခုလို တုံ့ပြန်ထားတာ ဖြစ်ပါတယ်။
လားရှိုးမြို့ကို တော်လှန်ရေးအင်အားစုတွေ သိမ်းပိုက်နိုင်မှုဟာ တော်လှန်ရေးအတွက် အားတက်စရာဖြစ်ခဲ့ပြီး MNDAA အနေနဲ့ လားရှိုးမြို့ကနေ ဆုတ်ခွာခဲ့ရင်တောင် ဖိအားအမျိုးမျိုးကြောင့်ဖြစ်နိုင်တယ်လို့ PLA ရဲ့ အထွေထွေအတွင်းရေးမှူး ရဲဘော်နီနီကျော်က ရွှေဖီမြေကို ပြောပါတယ်။
“လားရှိုးတိုက်ပွဲမှာ ကျွန်မတို့ အတွေ့အကြုံ၊ စစ်ပညာတွေ အများကြီးရခဲ့ပါတယ်။ အသက်သွေးချွေး အများကြီး ပေးဆပ်ပြီး ခက်ခက်ခဲခဲနဲ့ ရတဲ့နေရာကို ကျွန်မတို့ကတော့ လက်မလွတ်ချင်ဘူးပေါ့နော်။ MNDAA က ဆုတ်ပေးခဲ့ရင်လည်း လူထုတွေအတွက် စဥ်စားပြီးမှ မဖြစ်မနေ ဆုတ်ရတယ်။ မြို့ကနေ လုံးဝဆုတ်တာ မဟုတ်ဘဲ မြို့ပြင်ကနေ နေတာလည်း ဖြစ်နိုင်တာပေါ့နော်”
PLA တပ်ဟာ တော်လှန်ရေးအင်အားစုတွေနဲ့ ပူးပေါင်းပြီး မြေပြန့်ဒေသအပါအဝင် နိုင်ငံတဝန်းမှာ စစ်ကောင်စီအမြစ်ပြတ်တဲ့အထိ ဆက်လက်တော်လှန်တိုက်ခိုက်သွားမယ်လို့ ရဲဘော်နီနီကျော်က ဆက်ပြောပါတယ်။
လားရှိုးမြို့သိမ်းတိုက်ပွဲမှာ MNDAA နဲ့အတူ PLA အပါအဝင် ဗမာပြည်သူ့လွတ်မြောက်ရေးတပ်တော် BPLA နဲ့ နွေဦးတော်လှန်ရေးတပ်တွေလည်း ပါဝင်တိုက်ခိုက်ခဲ့တာ ဖြစ်ပါတယ်။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို MNDAA နဲ့ နွေဦးတော်လှန်ရေးတပ်တွေက ပူးပေါင်းပြီး ၂၀၂၄ ခုနှစ် သြဂုတ်လ ၃ ရက်မှာ တိုက်ခိုက်သိမ်းပိုက်ထားတာ ဖြစ်ပါတယ်။
တရုတ်ရဲ့ ကြားဝင်စေ့စပ်မှုနဲ့ စစ်ကောင်စီတပ်နဲ့ MNDAA တပ်တို့အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ ဧပြီ ၂၁ ရက် နောက်ဆုံးထားကာ လားရှိုးမြို့ကနေ ထွက်ခွာရမှာဖြစ်ပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက်လည်ပတ်မှာဖြစ်တယ်လို့ သတင်းတွေ ထွက်ပေါ်နေတာဖြစ်ပါတယ်။
စစ်ကောင်စီတပ်နဲ့ ကိုးကန့်တပ်ရဲ့ ဆွေးနွေးမှုသဘောတူညီချက်နဲ့ ပတ်သက်ပြီး စစ်ကောင်စီရော ကိုးကန့်တပ်ဘက်ကပါ ထုတ်ပြောတာမရှိသေးဘဲ အသေးစိတ်သိရဖို့ MNDAA ရဲ့ ပြောရေးဆိုခွင့်ရှိသူ လီကျာဝင်းကို ဆက်သွယ်မေးမြန်းနေဆဲ ဖြစ်ပါတယ်။
