မိုင်းရူပ၊ ဇန်နဝါရီ ၁၄ ရက်၊ လောက်ကိုင်
ကိုးကန့်တပ်မတော်- MNDAA ထိန်းချုပ်ထားတဲ့ ကိုးကန့်ဒေသမှာ တိုက်ပွဲအတွင်း ကိုယ်လက်အင်္ဂါ ဆုံးရှုံးခဲ့တဲ့ လူထုတွေကို ခြေတု လက်တု အခမဲ့ တပ်ဆင်ပေးသွားမယ်လို့ သိရပါတယ်။
ကိုးကန့်ဒေသ ကျန်းမာရေးဌာနရဲ့ ပြောရေးဆိုခွင့်ရှိသူ ဒေါက်တာ ဘသက်ကို လားရှိုး ပြန်လည်ထူထောင်ရေးအဖွဲ့က တွေ့ဆုံမေးမြန်းစဉ် ဒေါက်တာ ဘသက်က အခုလို ပြောကြားခဲ့ပါတယ်။
“စစ်ဒဏ်နဲ့ မြေမြှုပ်မိုင်းကြောင့် ခြေလက်အင်္ဂါ ဆုံးရှုံးခဲ့ရတဲ့ ပြည်သူတွေအတွက် ဒီနှစ်ဆန်းပိုင်းကနေ စပြီးတော့ ခြေတု လက်တု အခမဲ့ တပ်ဆင်ပေးခြင်းလုပ်ငန်းကို လုပ်ဆောင်ပေးသွားမှာဖြစ်တယ်” လို့ ဒေါက်တာ ဘသက်က ပြောပါတယ်။
ဒ့ါအပြင် ကိုးကန့်ဒေသအတွင်း ကျန်းမာရေးလုပ်ငန်းတွေကို အဆင့်မြှင့် ဆောင်ရွက်သွားမှာဖြစ်ပြီး လူငယ်မျိုးဆက်သစ် ဆရာဝန်တွေကို အဆင့်မြင့် ဆေးပညာရပ် သင်ကြားနိုင်အောင် စီစဉ်ပေးသွားမယ်လို့ ဒေါက်တာ ဘသက်က ဆက်ပြောပါတယ်။
လားရှိုး ပြန်လည်ထူထောင်ရေးရဲ့ တာဝန်ရှိသူတစ်ဦးကလည်း ကိုးကန့်ဒေသထဲက တိုက်ပွဲအတွင်း ကိုယ်လက်အင်္ဂါ ဆုံးရှုံးခဲ့ရတဲ့ လူထုအားလုံးကို ခြေတု လက်တု တပ်ဆင်ပေးသွားမှာ ဖြစ်တယ်လို့ ပြောပါတယ်။
“၁၀၂၇ စစ်ဆင်ရေးလို့ ခေါင်းစဉ် မတပ်ထားဘူး။ အဓိကတော့ တိုက်ပွဲကာလပဲဖြစ်ဖြစ် လေယာဉ်ဒဏ်ကြောင့်ပဲဖြစ်ဖြစ် ကိုယ်လက်အင်္ဂါ ဆုံးရှုံးခဲ့ရတဲ့သူတွေအတွက် အဓိကပေါ့”
MNDAA ဟာ ၁၀၂၇ စစ်ဆင်ရေးအတွင်း ချင်းရွှေဟော်၊ လောက်ကိုင်၊ ကုန်းကြမ်း၊ သိန္နီ၊ ကွမ်းလုံ၊ လားရှိုး၊ ကြူကုတ်(ပန်ဆိုင်း)၊ မုံးကိုးနဲ့ တာမိုးညဲ စတဲ့မြို့ ၉ မြို့ကို တိုက်ခိုက်သိမ်းပိုက်ထားပြီး ၎င်းတို့ရဲ့ အုပ်ချုပ်ရေးယန္တရား လည်ပတ်နေပါတယ်။
