လွေးထွေး၊ မတ်လ ၂ ရက်၊ နောင်ချို
ရှမ်းမြောက် နောင်ချိုမြို့နယ် သုံးဆယ်ရွာ ကွင်းလမ်းအကျော်က စစ်ကောင်စီတပ်ရဲ့ စစ်ဆေးရေးဂိတ်မှာ ခရီးသည်ကားနဲ့ ကုန်ကားတချို့ဟာ ၅ သောင်းကနေ ၂ သိန်းအထိ ပေးနေရတယ်လို့ ကိုယ်တိုင် ပေးဆောင်ခဲ့ရသူ အမျိုးသားတစ်ဦးက ပြောပါတယ်။
ဖေဖော်ဝါရီ ၂၈ ရက်နဲ့ မနေ့ မတ်လ ၁ ရက်မှာ စစ်တပ်က ခရီးသည်ကားတစ်စီးကို ကျပ် ၅ သောင်းနဲ့ ကုန်တင်ကားတစ်စီးကို ကျပ် ၂ သိန်းအထိ တောင်းခံနေတာပဲ ဖြစ်ပါတယ်။
ကိုယ်တိုင် ကြုံတွေ့ခဲ့ရသူ အမျိုးသားက “သူတို့(စကစ) လူပြောင်းသွားသလိုဘဲ အရင်က စစ်နေတဲ့သူ မဟုတ်ဘူး။ အရင်ကလည်း ငွေ ပေးရတယ်။ ထောင်ဂဏန်း သောင်းဂဏန်းဘဲ။ အခုက ကားကြီးကို ၂ သိန်းဆိုတော့ များတာပေါ့” လို့ ရွှေဖီမြေကို ပြောပါတယ်။
စစ်တပ်က ငွေ တောင်းပေမဲ့ ပြေစာလည်း မရသလို အခွန်ကောက်ခံတာမျိုးလည်း မဟုတ်ဘဲ ဖြစ်သလိုသာ ငွေတောင်းနေတာကြောင့် ခရီးသွားအတွက် အခက်အခဲ ဖြစ်စေတယ်လို့လည်း သူက ဆက်ပြောပါတယ်။
နမ့်ဆန်မြို့နယ်မှ မန္တလေးမြို့သို့ ခရီးသွားသူ အမျိုးသမီးက “မနေ့က ဆင်းလာတာ ဟုတ်တယ် ဂိတ်တိုင်း တားတယ် စစ်တယ်။ ကားဆရာတွေ ပိုက်ဆံ ပေးနေရတာ တွေ့တယ်။ အဲဒီကွင်းလမ်းအကျော်နဲ့ ထင်းရှူးတောထဲမှာ အများကြီး ပိုပေးရတာတွေ့တယ်” လို့ ပြောပါတယ်။
ဒါ့အပြင် နောင်ချိုနဲ့ ပြင်ဦးလွင်ကြားက စစ်တပ်ရဲ့ စစ်ဆေးရေးဂိတ်ဖြစ်တဲ့ ဝက်ဝံဂိတ်မှာလည်း ဖြတ်သန်းသွားလာတဲ့ ခရီးသည်ကားနဲ့ ကုန်ကားတွေကို စစ်ဆေးမှု ကြမ်းတမ်းတာ၊ ငွေညစ်တာတွေလည်း ရှိနေတယ်လို့ ကားသမားတွေရဲ့ ပြောပြချက်အရ သိရပါတယ်။
နောင်ချိုနဲ့ မန္တလေးမြို့အထိ စစ်တပ်ရဲ့ စစ်ဆေးရေးဂိတ် ၈ ခုဝန်းကျင်ရှိပြီး ဂိတ်တိုင်းကို ငွေ ပေးနေရတယ်လို့ ကားသမားတွေက ရွှေဖီမြေသို့ ပြောဆိုပါတယ်။
စစ်တပ် ထိန်းချုပ်ထားတဲ့ မြို့တွေဖြစ်တဲ့ မူဆယ်၊ မိုင်းရယ်၊ တန့်ယန်းနဲ့ နမ့်လန်မြို့မှာလည်း စစ်ကောင်စီတပ်က ဒေသခံလူထုတွေကို စစ်ဆေး ဖမ်းဆီးတာနဲ့ ငွေတောင်းတာတွေလည်း မကြာခဏ လုပ်ဆောင်နေပါတယ်။
