လွေးဇွန်မိုး၊ စက်တင်ဘာ ၄ ရက်၊ ကျောက်မဲ
တအာင်းတပ် TNLA ထိန်းချုပ်ထားတဲ့ ရှမ်းမြောက်ကျောက်မဲမြို့နယ် ပန်ကွမ်ကျေးရွာ ဘုန်းကြီးကျောင်းကို စစ်ကောင်စီတပ်က လေကြောင်းကနေ ထပ်မံ ဗုံးကြဲတိုက်ခိုက်ခဲ့တယ်လို့ သိရပါတယ်။
ဒီနေ့ စက်တင်ဘာ ၄ ရက် မနက် ၁၀ နာရီမှာ ကျောက်မဲ – မိုင်းလုံလမ်းပိုင်းမှာရှိတဲ့ ပန်ကွမ်ရွာ ဘုန်းကြီးကျောင်းကို စစ်ကောင်စီတပ်က ဂျက်ဖိုက်တာနဲ့ ပေါင် ၂၅၀ ဗုံး ၂ လုံး ကြဲချတိုက်ခိုက်ခဲ့တာလို့ ဖြစ်စဥ်သိရှိသူ အမျိုးသားတစ်ဦးက ပြောပါတယ်။
“ပန်ကွမ်ဘုန်းကြီးကျောင်းကို လာကြဲတာ။ စေတီတွေ ပျက်စီးသွားတယ်” လို့ ဆိုပါတယ်။
ဗုံးကြဲတာနဲ့ ပတ်သက်ပြီး ထိခိုက်သေဆုံးမှု ရှိမရှိကိုတော့ သီးခြားအတည်မပြုနိုင်သေးပဲ ရွှေဖီမြေက ဆက်လက်စုံစမ်းနေဆဲဖြစ်ပါတယ်။
အလားတူ မနေ့ စက်တင်ဘာ ၃ ရက် နေ့လယ် ၂ နာရီဝန်းကျင်မှာလည်း ရှမ်းမြောက် သီပေါမြို့နယ် ဘော်ကြိုရွာကို စစ်ကောင်စီတပ်က လေကြောင်းကနေ ဗုံး ၂ လုံး ကြဲချတိုက်ခိုက်ခဲ့တာကြောင့် အမျိုးသား ၁ ဦး ဒဏ်ရာရရှိတာအပြင် နေအိမ် ၂ လုံးလည်း ထိမှန်ပျက်စီးခဲ့တယ်လို့ ဆိုပါတယ်။
ရွှေဖီမြေက ရရှိထားတဲ့ စာရင်းတွေအရ ပြီးခဲ့တဲ့ ဩဂုတ် ၁ ရက်ကနေ ၃၀ ရက်အထိ တစ်လအတွင်း စစ်ကောင်စီတပ်ရဲ့ လေကြောင်းတိုက်ခိုက်မှုနဲ့ လက်နက်ကြီးပစ်ခတ်မှုကြောင့် တအာင်းတပ် TNLA ထိန်းချုပ်ဒေသက ကလေး ၅ ဦး အပါအဝင် အရပ်သား ၅၇ ဦး သေဆုံးပြီး ၆၆ ဦး ဒဏ်ရာရခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
