မိုင်းရူပ၊ ဧပြီ ၂၄ ရက်၊ နောင်ချို
အပစ်ရပ်သက်တမ်း တိုးထားတဲ့ စစ်ကောင်စီတပ်ဟာ တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် နောင်ချိုမြို့အနီးရှိ ကျေးရွာတွေကို Y-12 လေယာဉ်အသုံးပြုပြီး ဗုံး ၂၉ လုံး ကြဲချတိုက်ခိုက်ခဲ့ပါတယ်။
ဒီနေ့ ဧပြီ ၂၄ ရက် ည ၆ နာရီခန့်မှာ TNLA ထိန်းချုပ်ထားတဲ့ နောင်ချိုမြို့အနီးရှိ ကျောက်ကြမ်း၊ အုမ္မခါးနဲ့ အုမ္မတီးရွာထဲ Y-12 လေယာဉ်အသုံးပြုပြီး ဗုံးကြဲချတိုက်ခိုက်ခဲ့တာပဲ ဖြစ်ပါတယ်။
“ကျောက်ကြမ်း၊ အုမ္မခါးဘက်မှာ ကြဲတာ။ မြို့ထဲမှာ ကြဲတာတော့ မရှိဘူး။ အလုံး ၃၀ လောက်ရှိတယ်” လို့ နောင်ချိုဒေသခံတစ်ဦးက ရွှေဖီမြေကို ပြောပါတယ်။
ဗုံးကြဲတိုက်ခိုက်မှုကြောင့် ထိခိုကိမှုသေဆုံးမှု အခြေအနေကို ရွှေဖီမြေက ဆက်လက် စုံစမ်းနေဆဲ ဖြစ်ပါတယ်။
စစ်တပ်ဟာ အပစ်ရပ်မယ်လို့ ကြေညာထားပေမဲ့ တော်လှန်ရေးတပ်တွေ ထိန်းချုပ်ထားတဲ့ ဒေသတွေကို လေကြောင်းနဲ့တိုက်ခိုက်တာ ထိုးစစ်ဆင်တာတွေ ဆက်တိုက် လုပ်ဆောင်နေပါတယ်။
ဧပြီ ၂၃ ရက်ကနေ ဧပြီ ၃၀ ရက်အထိ အပစ်ရပ်သက်တမ်း ထပ်တိုးလိုက်ကြောင်း စစ်ကောင်စီက ထုတ်ပြန်ထားပါတယ်။
စစ်ကောင်စီရဲ့ အမြှောက်တပ်တွေ တည်ရှိရာ နောင်ချိုမြို့နယ် တောင်းခမ်းနဲ့ အုမ္မတီးရွာမှာတော့ စစ်တပ်ဘက်က ထိုးစစ်ဆင် တိုက်ခိုက်နေတာကြောင့် စစ်ကောင်စီတပ်နဲ့ TNLA ပူးပေါင်းတပ်တို့ တိုက်ပွဲ ဆက်လက် ပြင်းထန်နေပါတယ်။
