လွေးဇွန်မိုး၊ ဩဂုတ် ၂၁ ရက်၊ နောင်ပိန်
တအာင်းတပ်မတော်- TNLA နဲ့ စစ်ကောင်စီတပ်တို့အကြား ဖြစ်ပွားတဲ့ တိုက်ပွဲကြောင့် ကျောက်မဲမြို့နယ် နောင်ပိန်ရွာကနေ လားရှိုးမြို့ထဲ စစ်ရှောင်လာတဲ့ ဒေသခံ ၇၀ နီးပါးအတွက် စားနပ်ရိက္ခာ အရေးပေါ်အကူအညီ လိုအပ်နေတယ်လို့ သိရပါတယ်။
မနေ့ ဩဂုတ် ၂၀ ရက်နဲ့ ဒီနေ့ ဩဂုတ် ၂၁ ရက်အထိ နောင်ပိန်ရွာကနေ လားရှိုးမြို့ထဲ စစ်ဘေးရှောင်လာတဲ့ ဒေသခံ ၇၀ နီးပါး ရှိလာပြီလို့ FYO အသင်းရဲ့ တာဝန်ရှိသူတစ်ဦးက ပြောပါတယ်။
“သူတို့အကုန်လုံးက ဆေးရုံမှာပဲ လူနာစောင့်အနေနဲ့ပေါ့။ သူတို့ ရွာသူရွာသားတွေအချင်းချင်း ပြန်စောင့်ကြတဲ့ပုံစံပေါ့။ လတ်တလောတော့ ဆေးရုံမှာပဲ။ ကျနော်တို့ နေရာထိုင်ခင်း စီစဉ်ပေးနေတယ် အခုတော့။ စားဖို့သောက်ဖို့လည်း ကျနော်တို့ အဓိက တာဝန်ယူထားတာပေါ့”
လက်ရှိမှာတော့ စစ်ရှောင်တွေ စားသောက်ဖို့အတွက် FYO အသင်းက ကူညီပေးထားပြီး နေရာထိုင်ခင်းအတွက်လည်း စီစဉ်နေတယ်လို့ ဆိုပါတယ်။
စစ်ရှောင်တွေ နေ့စဉ် စားသောက်ဖို့အတွက် စားသောက်ကုန် အရေးပေါ် အကူအညီ လိုအပ်နေပြီး စစ်ရှောင်တွေကို ကူညီချင်သူတွေအနေနဲ့ FYO အသင်းဖုန်း ၀၉-၉၈၀ ၅၉၅ ၃၀၇ ကို ဆက်သွယ်လှူဒါန်းနိုင်တယ်လို့ ဆိုပါတယ်။
စစ်ရှောင်လာသူ ၇၀ ဦးထဲ ကလေး ၆ ဦးအပါအဝင် ၃၄ ဦးဟာ ဒဏ်ရာရထားသူတွေဖြစ်ပြီး လားရှိုး ပြည်သူ့ဆေးရုံမှာ ကုသမှု ခံယူနေရတယ်လို့ သိရပါတယ်။
စစ်တပ်နဲ့ TNLA တို့အကြား ဖြစ်ပွားတဲ့ တိုက်ပွဲကြောင့် နောင်ပိန်ရွာအပြင် ဇီးပင်၊ ပင်ပေါ၊ ပင်တိန်၊ ပင်တီး၊ ကျောင်းကုန်း၊ ဖီသစ်၊ ခေးနင်းနဲ့ လွယ်ကုန် စတဲ့ကျေးရွာက ဒေသခံတွေဟာ ဘေးလွတ်ရာ ထွက်ပြေးတိမ်းရှောင်နေကြရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
