မိုင်းပန်ပျော်၊ ဇွန်လ ၂ ရက်၊ လားရှိုး
တရုတ်အကူအညီနဲ့ ရှမ်းမြောက် လားရှိုးမြို့ကို ပြန်လည် ထိန်းချုပ်ခွင့် ရခဲ့တဲ့ စစ်ကောင်စီဟာ လားရှိုးမြို့ရှိ မြန်မာ့စီးပွားရေးဘဏ်ကို ပြန်လည် ဖွင့်လှစ်တော့မယ်လို့ ဒေသခံတွေဆီက သိရပါတယ်။
မြန်မာ့စီးပွားရေးဘဏ်ကို မနက်ဖြန် ဇွန်လ ၃ ရက် မနက်ပိုင်း ၉ နာရီကစပြီး လုပ်ငန်း စတင်လည်ပတ်သွားမယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“ဟုတ်တယ် မြန်မာ့စီးပွားရေးဘဏ် ပြန်ဖွင့်ပြီ။ ခုဏက အဲဘက်သွားတာ ပြန်ဖွင့်တာ တွေ့လိုက်တယ်”
ဘဏ်မှာ ဌာနဆိုင်ရာတွေရဲ့ လစာနဲ့ငွေကြေးဆိုင်ရာကိစ္စအပြင် ပင်စင်လစာ၊ လူထုတွေရဲ့ ငွေစုငွေလွှဲ ငွေထုတ်တွေကို ပြန်လည်ပြီး ဝန်ဆောင်မှု ပေးသွားမယ်လို့ လားရှိုးဒေသခံတွေဆီက သိရပါတယ်။
စစ်ကောင်စီဟာ လားရှိုးမြို့ထဲ ဝင်ရောက်လာတာ ၁ လကျော် ကြာပြီးနောက် စည်ပင်၊ လဝက၊ လေဆိပ် ပြန်ဖွင့်ဖို့နဲ့ စာသင်ကျောင်း ပြန်လည် ဖွင့်လှစ်တာတွေ လုပ်ဆောင်နေပေမဲ့ မကြာခဏ ဖြစ်ပွားနေတဲ့ ခိုးဆိုးလုယက်တဲ့ကိစ္စကိုတော့ လုပ်ဆောင်ပေးနိုင်တာ မရှိသေးပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
