ပို့လဘား၊ မတ်လ ၂၅ ရက်၊ မူဆယ်
ရှမ်းမြောက် တရုတ်-မြန်မာနယ်စပ်ဖြစ်တဲ့ မူဆယ်မြို့မှာ စက်သုံးဆီကို စာအုပ်နဲ့ ဝယ်ယူခွင့် စတင်နေပြီး တစ်ပတ်မှာ ၂ ရက်သာ ဝယ်ယူနေရတယ်လို့ မူဆယ်ဒေသခံတစ်ဦးက ပြောပါတယ်။
မနေ့ မတ်လ ၂၄ ရက်ကစပြီး မူဆယ်မြို့ထဲက လိုင်စင်ရှိတဲ့ မော်တော်ယာဉ်နဲ့ ဆိုင်ကယ် မောင်းနှင်သူတွေဟာ စစ်ကောင်စီ ထုတ်ပေးတဲ့ စက်သုံးဆီ ဝယ်ယူခွင့်စာအုပ်နဲ့ ဝယ်ယူကြရသလို ပန့်ဆီဆိုင်မှာလည်း အကန့်အသတ်နဲ့သာ ရောင်းချပေးနေတယ်လို့ ပြောပါတယ်။
“မနေ့မှ ဆီဆိုင်တွေက ဆီ စပေးတာ။ စာအုပ်ရှိတဲ့သူတွေဆို တစ်လီတာ ၅,၅၀၀ ရောင်းတယ်။ စာအုပ် မရှိတဲ့သူဆိုရင် ဒီဇယ် တစ်လီတာကို ၇,၁ဝဝ။ ဓာတ်ဆီတော့ မပြောတတ်ဘူး။ အဲလောက်ပဲ ထင်တယ်။ စာအုပ်ကျတော့ ခရိုင်မှာ လုပ်ပေးတယ်ထင်တယ်။ ပြီးခဲ့တဲ့ ဒီဇင်ဘာလကတည်းက လျှောက်ထားတာ။ စာအုပ်လုပ်ရင်လည်း မူဆယ်လိုင်စင်တွေရှိမှ စာအုပ်လုပ်ပေးတာ။ ကားနဲ့ဆိုင်ကယ် အတူတူပဲ”
မူဆယ်မြို့ထဲက စက်သုံးဆီ ဝယ်ယူခွင့်စာအုပ်ရှိတဲ့ မော်တော်ယာဉ်တွေကို တစ်ပတ်မှာ ဓာတ်ဆီ ၂၂.၅ လီတာကိုသာ ရောင်းပေးတယ်လို့ ဆိုပါတယ်။
ပြီးခဲ့တဲ့ ၂၀၂၄ ခုနှစ် ဒီဇင်ဘာ ၅ ရက်ကလည်း မူဆယ်မြို့ထဲက လမ်းဘေးမှာ ရောင်းနေကြတဲ့ ဓာတ်ဆီတွေကို စစ်ကောင်စီက ရောင်းခွင့်မပြုဘဲ လိုက်လံ သိမ်းဆည်းခဲ့ဖူးပါတယ်။
မူဆယ်မြို့မှာရှိတဲ့ တရုတ်-မြန်မာ နယ်စပ်ဂိတ်ဖြစ်တဲ့ နန်းတော်ပေါက်နဲ့ ဆင်ဖြူပေါက်ဂိတ်ကို ပြီးခဲ့တဲ့ ၂၀၂၄ ခုနှစ် အောက်တိုဘာ ၂၂ ရက်ကစပြီး တရုတ်ဘက်က ကုန်ပစ္စည်း တင်းတင်းကြပ်ကြပ် စစ်ဆေးပြီး သယ်ယူခွင့် ပိတ်ပင်ထားပါတယ်။
