ရွှေဖီမြေ၊ မတ်လ ၂ ရက်၊ မူဆယ်
မြန်မာ-တရုတ် နယ်စပ်ဂိတ် ဖြတ်ကျော်စာအုပ် လုပ်ဆောင်ပေးရာမှာ ငွေသိန်းချီ ကောက်ခံနေတာ မရှိကြောင်း မူဆယ် လဝကရုံးဘက်က ငြင်းဆိုပါတယ်။
ငွေသိန်းချီ တောင်းခံနေသူတွေဟာ ပွဲစားတွေသာဖြစ်ပြီး အခုလိုဖြစ်စဉ်မျိုး ကြုံတွေ့ရင် လဝကရုံးသို့ လာရောက်စုံစမ်းကြဖို့ မူဆယ် လဝကရုံးမှ တာဝန်ရှိသူတစ်ဦးက ပြောပါတယ်။
၎င်းက “Online များတွင် BP စာအုပ်အနီတစ်အုပ်အတွက် ငွေကြေး သိန်းဆယ်ချီ တောင်းခံလျက်ရှိပြီး အထက်အဆင့်ဆင့်သို့ လစဉ်ခွဲတမ်းအဖြစ် ခွဲဝေပေးလျက်ရှိကြောင်း ရေးသားလျက်ရှိသည်မှာ အမှန်တစ်ကယ် မြေပြင်တွင် ကာယကံမြောက် ပေးရကြောင်း သက်သေပြောဆိုနိုင်သူ မရှိကြောင်း မှန်ကန်မှု မရှိကြောင်း” ဆိုပြီး ရွှေဖီမြေသို့ ပြောဆိုလာပါတယ်။
မူဆယ်ခရိုင်ထဲ ပါဝင်တဲ့ မူဆယ်၊ နမ့်ခမ်းဒေသနေ လူထုတွေကိုသာ မြန်မာ-တရုတ် နိုင်ငံဖြတ်ကျော် ဝင်ထွက်ခွင့် တရားဝင် ထုတ်ပေးလျက်ရှိပြီး နှစ်နိုင်ငံ သဘောတူစာချုပ်အတိုင်း ကိုက်ညီသူတိုင်းကိုသာ စည်းကမ်းသတ်မှတ်ချက်နဲ့အညီ BP ထုတ်ပေးနေတယ်လို့ ပြောပါတယ်။
အခြားသောဒေသ ပြည်နယ်တိုင်းမှ လူထုတွေကိုမှု အရေးပေါ် ကျန်းမာရေး ဆေးကုသခြင်းနဲ့ အထောက်အထား ခိုင်လုံတဲ့ နှစ်နိုင်ငံ ချစ်ကြည်ရေး၊ အစည်းအဝေး၊ အားကစား နှီးနှောဖလှယ်ခြင်း အစီအစဉ်အတွက် အရေးပေါ်သွားရောက်မယ့်သူတွေကို အကန့်အသတ်နဲ့ ထုတ်ပေးနေကြောင်း ၎င်းက ဆက်ပြောပါတယ်။
အယုံလွယ်သူ ဒေသခံတွေကို မသမာသူတချို့ ပွဲစားက ငွေကြေး မတန်တဆ တောင်းခံပြီး ကြားခံ လုပ်ဆောင်နေမှုကို စိစစ်ဆောင်ရွက်နေပြီး လဝကရုံးမှ တာဝန်ရှိသူ ဝန်ထမ်းတွေဟာ မတန်တဆ တောင်းခံနေကြောင်း ပြောဆိုမှုမှာ မှန်ကန်မှု မရှိကြောင်း၊ လဝက ဝန်ထမ်းတွေဟာ ငွေကြေး ပိုမို တောင်းခံပိုင်ခွင့် မရှိကြောင်းနဲ့ နယ်စပ်ဖြတ်ကျော် ဝင်ထွက်လိုသူအနေနဲ့ သက်ဆိုင်ရာ ခရိုင်၊ မြို့နယ် လဝကရုံးသို့ ကိုယ်တိုင် လာရောက် စုံစမ်းနိုင်ကြောင်း ရွှေဖီမြေသို့ ပေးပို့လာတဲ့စာထဲ ရေးသားထားပါတယ်။
ဖေဖော်ဝါရီ ၂၇ ရက်က “မူဆယ်ခရိုင် လဝက ဝန်ထမ်းတွေက BP စာအုပ်တစ်အုပ်ကို သိန်း ၁၀၀ နဲ့ တရားမဝင် လုပ်ပေးနေပြီး ရလာတဲ့ငွေကို အထက်သို့ အဆင့်ဆင့် လာဘ်ထိုးထား”ဆိုတဲ့ သတင်းကို ရေးသားပြီးနောက် ရွှေဖီမြေသို့ အခုလို တုန့်ပြန်ပြောဆိုလာတာပဲ ဖြစ်ပါတယ်။
