လွေးထွေး၊ ဖေဖော်ဝါရီ ၂ ရက်၊ မူဆယ်
တရုတ်-မြန်မာနယ်စပ် မူဆယ်-၁၀၅ မိုင် ပြည်ထောင်စုလမ်းကို စစ်ကောင်စီတပ်က တရုတ်နှစ်သစ်ကူးကာလ ခဏတာ သွားလာခွင့်ပြုပြီး ပြန်ပိတ်လိုက်ပြီဖြစ်ကြောင်း ဒေသခံတွေရဲ့ ပြောပြချက်အရ သိရပါတယ်။
အဲဒီလမ်းကို ပြီးခဲ့တဲ့ ဇန်နဝါရီလ နောက်ဆုံးအပတ် တရုတ်နှစ်သစ်ကူးကာလမှာ ခဏတာ ဖြတ်သန်းခွင့်ပေးပြီး ပြန်ပိတ်လိုက်တာ ဖြစ်ပါတယ်။
၁၀၅ မိုင်ဒေသခံ ကားသမားတစ်ဦးက “အဲလမ်းကိစ္စက မပြောတတ်တော့ဘူး။ ဟိုနေ့ ကျနော်သွားတာ အသွားရော အပြန်ရော ရတယ်။ နောက်တစ်ရက် အိမ်က ကလေးတွေ ပြန်သွားတယ် ဖြတ်မရတော့ဘူးတဲ့။ ဒီမနက် ပြန်ကြည့်တော့ အဲဘက်ကလာတဲ့လူတွေ ပြန်ရှိတယ်” လို့ ပြောပါတယ်။
စစ်တပ်ဟာ ဂိတ်ကို မနက်ပိုင်းသာ ပေးဖြတ်ပြီး ညနေပိုင်းမှာတော့ ဖြတ်သန်းသွားလာခွင့် ပိတ်ထားတယ်လို့လည်း မူဆယ် တောင်ရပ်ကွက်နေ အမျိုးသမီးက ပြောပါတယ်။
“၂၈ ရက်က ဖွင့်တယ်ပေါ့။ အဲနေ့ကစပြီး ညနေပိုင်းဆို ပိတ်တာဘဲ။ လူတွေ အများကြီး ပြန်လှည့်နေရတယ်။ သူတို့က ပိတ်လိုက် ဖွင့်လိုက်ပါဘဲ။ မမှန်ဘူး။ တချို့လူတွေက ပိုက်ဆံ ပေးရင်တော့ သွားရတယ် ပြောတယ်”
၎င်းလမ်းကို စစ်တပ်က ပြီးခဲ့တဲ့ ၁၀၂၇ စစ်ဆင်ရေး ပထမလှိုင်းကတည်းက စတင်ပိတ်ထားတာဖြစ်ပြီး မူဆယ်မြို့ထဲမှာတော့ စစ်တပ်က ခံစစ်အနေနဲ့ ပြင်ဆင်ထားသလို မူဆယ်မြို့နဲ့ ၁၅ မိနစ်သာ ဝေးတဲ့ ၁၀၅ မိုင် ကုန်သွယ်ရေးဇုန်ကိုတော့ ညီနောင်မဟာမိတ် ၃ ဖွဲ့က ထိန်းချုပ်ထားတာ ဖြစ်ပါတယ်။
