မိုင်းရူပ၊ အောက်တိုဘာ ၁၂ ရက်၊ လားရှိုး
စစ်ကောင်စီတပ် ထိန်းချုပ်ထားတဲ့ ရှမ်းမြောက် လားရှိုးမြို့မှာ မဲဆန္ဒရှင်တွေကို မဲစာရင်းလာကြည့်ဖို့ စစ်ကောင်စီရဲ့ ရွေးကောက်ပွဲကော်မရှင်က ပြောနေပေမယ့် စစ်ကောင်စီကျင်းပမယ့် ရွေးကောက်ပွဲအပေါ် လူထုအများစု စိတ်မဝင်စားကြဘူးလို့ မြို့ခံတွေက ရွှေဖီမြေကို ပြောပါတယ်။
စစ်ကောင်စီ ဦးဆောင်ကျင်းပမယ့် ရွေးကောက်ပွဲမှာ မဲပေးနိုင်တဲ့ မဲဆန္ဒရှင်စာရင်းတွေကို ရပ်ကွက်ရုံးတွေမှာ ကပ်ထားပြီး စစ်ကောင်စီလက်အောက်ခံ ဝန်ထမ်းတွေလောက်သာ မဲစာရင်း လာကြည့်ကြတယ်လို့ ဆိုပါတယ်။
“ရပ်ကွက်ထဲမှာ သွားကြည့်တဲ့သူက နည်းတယ်။ စိတ်ဝင်စားတဲ့သူက မရှိကြပါဘူး။ ဌာနရာဆိုင်ရာ ဝန်ထမ်းတွေကတော့ သွားကြည့်ကြတာပေါ့။ ပြီးတော့ ထွေအုပ်က ဓာတ်ပုံလာရိုက်ကြတယ်” လို့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
နောက်ထပ် လားရှိုးဒေသခံ အမျိုးသားတစ်ဦးကလည်း စစ်ကောင်စီကျင်းပမယ့် ရွေးကောက်ပွဲအပေါ် စိတ်ဝင်စားမှုမရှိဘဲ မဲစာရင်းကိုလည်း သွားရောက်ကြည့်ခဲ့တာ မရှိဘူးလို့ ရွှေဖီမြေကို ပြောပါတယ်။
“ရပ်ကွက်ရုံးမှာ ကပ်ထားတာ ပြောတယ်။ သွားမကြည့်ဖြစ်ဘူး။ အားလုံးက ကိုယ်အလုပ်နဲ့ ကိုယ်ပဲ” လို့ ဆိုပါတယ်။
ဒါ့အပြင် လားရှိုးမှာ ဝင်ပြိုင်မယ့် ပါတီတွေကို လက်ရှိအချိန်အထိ လူထုအများစုက မသိကြဘူးလို့လည်း မြို့ခံတွေက ပြောပါတယ်။
စစ်ကောင်စီကျင်းပမယ့် ရွေးကောက်ပွဲ အပိုင်း (၁) မှာ မဲဆန္ဒရှင်တွေရဲ့ စာရင်းကို စက်တင်ဘာ ၃၀ ရက်ကနေ အောက်တိုဘာ ၁၄ ရက်အထိ သက်ဆိုင်ရာ ရပ်ကွက်တွေမှာ ကပ်ထားမယ်လို့ စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ထားပါတယ်။
ဒါပေမဲ့ စစ်ကောင်စီရဲ့ မဲစာရင်း မှားယွင်းမှုရှိနေတယ်ဆိုပြီး စစ်ကောင်စီလက်အောက်ခံ ကြံ့ခိုင်ရေးနဲ့ ဖွံ့ဖြိုးရေးပါတီ (USDP) ရဲ့ နေပြည်တော်ကောင်စီနယ်မြေ ဥက္ကဋ္ဌ ဦးလှဆွေက ထုတ်ပြောခဲ့ပြီးနောက် မဲစာရင်းကပ်တဲ့ရက်ကို အောက်တိုဘာ ၂၀ ရက်အထိ စစ်ကောင်စီရဲ့ ရွေးကောက်ပွဲကော်မရှင် ရက်တိုးထားပါတယ်။
ရွေးကောက်ပွဲ ပထမအပိုင်းကို လာမယ့် ဒီဇင်ဘာ ၂၈ ရက်မှာ မြို့နယ်ပေါင်း ၁၀၂ မြို့မှာ စတင်ပြုလုပ်မှာဖြစ်ပြီး အပိုင်း ၃ ပိုင်းနဲ့ ကျင်းပသွားမယ်လို့ စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ထားပါတယ်။
ရှမ်းမြောက် မူဆယ်၊ နောင်ချိုနဲ့ လားရှိုးမြို့တွေကို ရွေးကောက်ပွဲ ပထမအပိုင်း ကျင်းပမယ့် နယ်မြေတွေထဲမှာ စစ်ကောင်စီက ထည့်သွင်းထားတာ တွေ့ရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
