ပို့လဘား၊ ဇန်နဝါရီ ၂၇ ရက်၊ နောင်ချို
ရှမ်းမြောက် နောင်ချိုမြို့နယ်မှာ စစ်ကောင်စီတပ်က ဒေသခံတွေရဲ့ နေအိမ် ၂၀ ကျော်ကို မီးရှို့ဖျက်ဆီးခဲ့တယ်လို့ တအာင်းတပ်မတော်- PSLF/TNLA က မနေ့ ဇန်နဝါရီ ၂၆ ရက်မှာ ထုတ်ပြန်ထားပါတယ်။
မနေ့ညနေ ၅ နာရီမှာ စစ်တပ်က အုမ္မသီးရွာမှာရှိတဲ့ ဒေသခံ နေအိမ်တွေကို မီးရှို့ဖျက်ဆီးခဲ့သလို ပြီးခဲ့တဲ့ ၂၀၂၄ ဒီဇင်ဘာ ၂၉ ရက်နဲ့ ၂၀၂၅ ဇန်နဝါရီ ၁၉ ရက်ကလည်း မီးရှို့ဖျက်ဆီးခဲ့တယ်လို့ ဖော်ပြထားပါတယ်။
ဒေသခံတစ်ဦးက “သူတို့ မူးလာရင် အိမ်တွေကို လိုက်မီးရှို့နေတာ။ ယူလို့ရတဲ့ ပစ္စည်းတွေလည်း ယူသွားတာေပါ့။ အိမ်နှစ်ဆယ်ကျော် သူတို့ ရှို့တာ။ နှစ်ရက်ခြားတစ်ခါ လာရှို့နေသလို ဖြစ်နေတာ” လို့ ပြောပါတယ်။
စစ်တပ်ဟာ တိုက်ပွဲ ဖြစ်ပွားခြင်းမရှိဘဲ အရပ်သားကို ရည်ရွယ်ချက်ရှိရှိ ဦးတည် ဗုံးကြဲတိုက်ခိုက်နေတာကြောင့် လူထုအနေနဲ့ ဗုံံးကြဲတိုက်ခိုက်မှု ရှောင်ရှားနိုင်ဖို့၊ စစ်ရေးသတိ အမြဲရှိဖို့ လိုအပ်ပြီး လေကြောင်းရန်မှ ကာကွယ်နိုင်ဖို့၊ လေကြောင်းရန်ကာကွယ်ရေးဆိုင်ရာ နည်းလမ်းတွေကို လိုက်နာဆောင်ရွက်ဖို့ လိုအပ်တယ်လို့ TNLA က သတိပေး ပြောဆိုထားပါတယ်။
ပြီးခဲ့တဲ့ ဇန်နဝါရီ ၂၂ ရက်ကလည်း နောင်ချိုမြို့ ရဲစခန်းနဲ့ ပါရမီ လက်ဖက်ရည်ဆိုင်ကို ဂျက်ဖိုက်တာနဲ့ ဗုံးကြဲတိုက်ခိုက်မှုကြောင့် ဒေသခံ ၈ ဦး သေဆုံးပြီး ၁ ဦး ထိခိုက်ဒဏ်ရာ ရရှိခဲ့ပါတယ်။
