အယ်လ်နော်အောင်၊ မတ်လ ၂၉ ရက်၊ မူဆယ်
ရှမ်းမြောက် တရုတ်-မြန်မာနယ်စပ်ဖြစ်တဲ့ မူဆယ်မြို့မှာ အွန်လိုင်းငွေလိမ်ဂိုဏ်း ကျားဖြန့်လုပ်ငန်းကို တရုတ်နိုင်ငံသား ၁ ထောင်ကျော်က ဆက်လက် လုပ်ကိုင်နေပါတယ်။
မူဆယ်မြို့ရှိ ကျားဖြန့်ရုံကို ပြည်သူ့စစ်ဘက်မှ ထိပ်တန်းပုဂ္ဂိုလ်က အဓိက လုပ်ကိုင်တာဖြစ်ပြီး လောင်းကစားဝိုင်းနဲ့ တရားမဝင် မူးယစ်ဆေးဝါး ထုတ်လုပ်ရောင်းချနေတာတွေလည်း ရှိတယ်လို့ ကျားဖြန့်ရုံကနေ လွတ်မြောက်လာတဲ့ မအိမွန်ဆိုသူ အမျိုးသမီးတစ်ဦးက ရွှေဖီမြေကို ပြောပါတယ်။
“တရုတ်စာ တရုတ်စကားတတ်တော့ ဖုန်းပဲ သုံးရတယ်။ လစာတော့ တရုတ်ငွေ တစ်လကို ၂ သောင်း (ကျပ်သိန်း ၁၂ဝ ကျော်) ရမယ်တဲ့။ မကောင်းတဲ့အလုပ်လည်း မဟုတ်ဘူးဆိုတော့ သူငယ်ချင်း ၄ ယောက်စုပြီး သွားလုပ်ကြတာ။ လစာကတော့ ၂ သောင်း တစ်ကယ်ရတယ်။ ရောက်တဲ့နေ့မှာပဲ သမီးတို့ ဖုန်းတွေကို သိမ်းသွားတယ်။ သူတို့ပေးတဲ့ ဖုန်းနဲ့ အလုပ် လုပ်ရတာ။ သူငယ်ချင်းက သူ့အိမ်နဲ့ ဖုန်းဆက်တာ မိသွားတော့ ရိုက်ခံရတယ် လစာ ဖြတ်တယ်။ သမီးတို့ အားရင် တိုက်ထဲဘဲ နေရတာ ဘယ်မှမသွားရဘူး။ အပေါ်ဆုံးထပ်မှာ မူးယစ်ဆေး ချက်တာတဲ့”
မူဆယ်မြို့မှာ ကျားဖြန့်လုပ်ကိုင်သူ တရုတ်နိုင်ငံသားအပါအဝင် မြန်မာနိုင်ငံသား ၅ သောင်းနီးပါးလည်း ပါဝင်လုပ်ကိုင်နေကြတယ်လို့ မူဆယ်မြို့မရဲစခန်းရှိ ရဲဝန်ထမ်းတစ်ဦးက ပြောပါတယ်။
မူဆယ်မြို့မှာရှိတဲ့ ရဲဝန်ထမ်းရဲ့ တစ်လ ဝင်ငွေဟာ သိန်းထောင်ချီ ရတဲ့သူ ရှိသလို လစာရတဲ့ ဝန်ထမ်းက ပိုများနေတာကြောင့် အချင်းချင်း တိုင်ကြားခဲ့တာ ရှိတယ်လို့ မြို့မရဲစခန်းရှိ ဝန်ထမ်းတစ်ဦးက ပြောပါတယ်။
“ကျားဖြန့် ပြည့်တန်ဆာ လောင်းကစားနဲ့ မူးယစ်ဆေး လုပ်တဲ့သူတွေက မြို့နယ်မှူး စခန်းမှူး ဒန SB နဲ့ CID လောက်သာ လိုင်းကြေး ပေးကြတာ။ ကျနော်တို့က ဘာမှမရဘူးလေ။ အပြောခံရရင် ရဲတွေဆိုပြီး ပြောကြတာ”
ပြီးခဲ့တဲ့ ဖေဖော်ဝါရီ ၁၈ ရက်ကလည်း အကျင့်ပျက်နေတဲ့ ဝန်ထမ်းတွေကို မူဆယ်ရှိ ရဲဝန်ထမ်းတွေက အရေးယူပေးဖို့ ရှမ်းပြည်နယ် ရဲတပ်ဖွဲ့မှူးဆီ စုပေါင်းတိုင်ကြားခဲ့ပေမဲ့ အရေးယူတာ မရှိခဲ့ဘူးလို့ သူက ဆက်ပြောပါတယ်။
