မိုင်းဖိူမ်းဆငဲ၊ အောက်တိုဘာ ၁၁ ရက်၊ ကျောက်မဲ
တအာင်းတပ် – PSLF/TNLA ထိန်းချုပ်ထားတဲ့ ကျောက်မဲခရိုင် မိုင်းလုံမြို့အထက်ရှိ မန်ဟုန်းကျေးရွာကို စစ်ကောင်စီတပ် ဗုံးကြဲတိုက်ခိုက်ခဲ့တာကြောင့် ဒဏ်ရာရသူထဲက ၃ ဦး ထပ်မံသေဆုံးသွားတာကြောင့် သေဆုံးသူ စုစုပေါင်း ၁၃ ဦးအထိ ရှိလာပြီဖြစ်တယ်လို့ သိရပါတယ်။
မြေပြင်သတင်းရင်းမြစ်တစ်ဦးက “အခု ရွာထဲမှာ ဘယ်သူမှ ပြန်မအိပ်ရဲသေးဘူး။ ဘာလို့လဲဆို သေတဲ့သူ ၁၃ လောင်းပြန်ဖြစ်သွားတာ။ ဒဏ်ရာရတဲ့သူတွေထဲက အကုန်လုံးသေသွားတယ်” လို့ ဆိုပါတယ်။
မန်ဟုန်းကျေးရွာကို ပြီးခဲ့တဲ့ အောက်တိုဘာ ၇ ရက်နေ့လယ်မှာ စစ်ကောင်စီတပ်က လေကြောင်းကနေ ပေါင် ၂၅၀ ဗုံးနှစ်လုံး ကြဲချတိုက်ခိုက်ခဲ့တာကြောင့် ကလေးတစ်ဦးအပါအဝင် ဒေသခံ ၁၀ ဦး ပွဲချင်းပြီး သေဆုံးသွားခဲ့ပါတယ်။
မနေ့ အောက်တိုဘာ ၁၀ ရက်မှာတော့ သေဆုံးသွားသူတွေထဲမှာ ကလေး ၃ ဦး၊ အမျိုးသမီး ၅ ဦး၊ အမျိုးသား ၅ ဦး စုစုပေါင်း ၁၃ဦးထိ ရှိလာတယ်လို့ TNLA က ထုတ်ပြန်ခဲ့ပါတယ်။
PSLF/TNLA ထိန်းချုပ်ထားတဲ့ မြို့နယ်တွေကို စစ်ကောင်စီတပ်က လေကြောင်းကနေ အဆက်မပြတ် ဗုံးကြဲတိုက်ခိုက်ခဲ့တာကြောင့် အောက်တိုဘာ ၂ ရက်ကနေ ဒီနေ့ ၁၁ ရက်အထိ ၁၀ ရက်အတွင်းမှာပဲ ကလေး ၆ ဦးအပါအဝင် သေဆုံးသူ ၃၁ ဦး ရှိလာပြီ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
