လွေးလာဝ်ဇာရ်၊ ဧပြီ ၁၀ ရက်၊ လားရှိုး
ရှမ်းမြောက် လားရှိုးမြို့နယ်ထဲမှာ ပြန်ပေးဆွဲ၊ ငွေညှစ်၊ လုယက်တာနဲ့ လူသတ်မှု ကျူးလွန်သူ လူငယ် ၅ ဦးကို ကိုးကန့်တပ် MNDAA က အများပြည်သူရှေ့ သေဒဏ်ပေးလိုက်တယ်လို့ သိရပါတယ်။
ဒီနေ့ ဧပြီ ၁၀ ရက် လားရှိုးမြို့ မန်ဆူကျောင်းနောက်ရှိ ကိုးကန့်ပါတီရုံးမှာ အမိန့်ချခဲ့တာဖြစ်ပြီး ပြစ်ဒဏ်ပေးခံရတဲ့အထဲမှာ လူသတ်မှု၊ ဓားပြတိုက်၊ မုဒိမ်းမှုနဲ့ မူးယစ်ဆေးဝါးသုံးစွဲသူတွေ ပါဝင်တယ်လို့ ဆိုပါတယ်။
၎င်းသေဒဏ်ပေးခံရသူ ၅ ဦးကို လေယာဉ်ကွင်းသွားတဲ့လမ်းက ဟိုပိတ်ဘက်မှာ သေနတ်နဲ့ ပစ်သတ်စီရင်လိုက်ပြီလို့ ဖြစ်စဉ်သိရှိသူ အမျိုးသမီးတစ်ဦးက ပြောပါတယ်။
“သူတို့က အဲဒီပြစ်မှုလုပ်ထားတဲ့ လူတွေကို သတ်မယ်ပြောတယ်။ လေယာဉ်ကွင်းအကျော် အဝေးကြီးဘဲ။ ဟိုဘက်မှာ ကျမတို့ လမ်းလျှောက်ရသေးတယ်။ စောင့်နေတဲ့ ကိုးကန့်တပ် ဝင်ကြည့်ချင်ရင် ဝင်လို့ရတယ်တဲ့ အဲဒါနဲ့ ကျမတို့လည်း ဝင်သွားတယ်။ လူတွေအများကြီးဘဲ။ ကျမနေတဲ့နေရာနဲ့ အလှမ်းဝေးတော့ သိပ်မမြင်ရဘူး။ ပစ်ပြီးမှ ကျမတို့ သွားကြည့်တာ။ အဲဒီ ၅ ယောက်က ဘာပြစ်မှုနဲ့လည်း မသိရဘူး” လို့ ပြောပါတယ်။
ပြစ်ဒဏ်ပေးခံရတဲ့သူ ၈ ဦးထဲမှာမှ ၅ ဦးက သေဒဏ်ပေးခံခဲ့ရပြီး ၃ ဦးက ထောင်ဒဏ်တစ်သက်တစ်ကျွန်းချမှတ်ခံရမှာ ဖြစ်တယ်လို့ နောက်ထပ် လားရှိုးမြို့ခံ အမျိုးသားတစ်ဦးက ပြောပါတယ်။
လားရှိုးမြို့ကို ကိုးကန့်တပ်ထိန်းချုပ်ပြီးနောက် လားရှိုးမြို့ပေါ် လူမြင်ကွင်းရှေ့မှာ ပြစ်မှုကျူးလွန်သူတွေကို ပထမဆုံးအချိန် စီရင်ချက်ချတာ ဖြစ်ပါတယ်။
ပြီးခဲ့တဲ့ ၂၀၂၄ ခုနှစ် မေလထဲမှာလည်း လားရှိုးမြို့နယ်ထဲမှာ လူသတ်မှု၊ မုဒိမ်းမှု၊ ဓားပြတိုက်မှု၊ ပြန်ပေးဆွဲမှု ကျူးလွန်သူ ၄ ဦးကို ကိုးကန့်တပ်က သေဒဏ်ချမှတ်ခဲ့ဖူးပါတယ်။
လူ့အခွင့်အရေးလှုပ်ရှားသူတွေကတော့ ကိုးကန့်တပ်ရဲ့ သေဒဏ်ပေးမှုအပေါ် သေဒဏ်ဟာ လူမဆန်တဲ့ ယုတ်ညံ့တဲ့ပြစ်မှုဖြစ်ကြောင်း ကန့်ကွက်ရှုတ်ချကြပါတယ်။
လားရှိုးမြို့ကို ထိန်းချုပ်ထားတဲ့ ကိုးကန့်တပ်ဟာ ဧပြီ ၂၁ ရက်နောက်ဆုံးထားကာ လားရှိုးမြို့ကနေ ထွက်ခွာရမှာဖြစ်ပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက်လည်ပတ်မှာ ဖြစ်ကြောင်း သတင်းတွေ ထွက်နေပါတယ်။
