မိုင်းပန်ပျော်၊ မတ်လ ၂၉ ရက်၊ လားရှိုး
တစ်နိုင်ငံလုံး ငလျင်ဘေးဒဏ် ခံနေရချိန်မှာ လူသားချင်း စာနာထောက်ထားမှုထားပြီး လားရှိုးမြို့မှာ ကျင်းပမယ့် သင်္ကြန်ပွဲတော်နဲ့ တခြားပျော်ပွဲရွှင်ပွဲတွေ မကျင်းပဖို့ ကိုးကန့်တပ်မတော်- MNDAA က ဒီနေ့ တရားဝင်စာ ထုတ်ပြန်လာပါတယ်။
မြန်မာနိုင်ငံအတွင်း အခုလို ငလျင်ဒဏ်ကို ခံစားနေရချိန်မှာ ပျော်ပွဲရွှင်ပွဲလုပ်ဖို့ မသင့်တော်တာကြောင့် အထူးဒေသ ၁ အတွင်း ဘယ်ပွဲမဆို မကျင်းပဖို့ စာထုတ်ပြန်တာ ဖြစ်တယ်လို့ လားရှိုးမြို့ပြန်လည်ထူထောင်ရေးအဖွဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
“ဒီငလျင်ဒဏ်ကြောင့် တစ်ဖက်ပြည်သူတွေက ခံစားနေရတဲ့အချိန်မှာ ကျနော်တို့ ဒီပျော်ပွဲရွှင်ပွဲတွေ လုပ်တာမျိုး မသင့်တော်ဘူးလေ။ အဲဒါကြောင့် သင်္ကြန်ပွဲတင် မဟုတ်ပဲနဲ့ ဒီအထူးဒေသ ၁ အတွင်းမှာ ဘာပျော်ပွဲရွှင်ပွဲမှ မလုပ်ဖို့ အပေါ်ကနေ စာထုတ်တာပါ”
ငလျင်ဒဏ် ခံနေရတဲ့ ဒေသတွေကို ငွေကြေးနဲ့ ပစ္စည်းတွေ လှူဒါန်းနိုင်ဖို့ အထူးဒေသ ၁ အတွင်းမှာရှိ မြို့နဲ့ခရိုင်ဘက်က အဓိက ခေါင်းဆောင်တစ်ဦး ခန့်အပ်ပြီး သဘာဝဘေး ကယ်ဆယ်ရေးအဖွဲ့ ဖွဲ့စည်းဖို့ ရှိတယ်လို့ ဆိုပါတယ်။
ဒေသခံ အရပ်ဘက်တပ်ဖွဲ့နဲ့ ကူညီထောက်ပံ့ပေးဖို့ ငလျင်ဒဏ် ခံနေရတဲ့ဒေသကို သက်ဆိုင်ရာအဖွဲ့အစည်းနဲ့ ချိတ်ဆက်ပြီး ကယ်ဆယ်ရေး စေတနာ့ဝန်ထမ်းနဲ့ အကောင်အထည်ဖော်ဖို့ ငလျင်ဒဏ်သင့်ဒေသတွေကို သွားရောက် ကူညီပေးဖို့ ပြင်ဆင်နေတယ်လို့ ပြောပါတယ်။
ဒါ့အပြင် MNDAA ထိန်းချုပ်ထားတဲ့ နယ်မြေအတွင်းမှာရှိတဲ့ ဆေးရုံတွေမှာ ငလျင်ဒဏ် ခံနေရတဲ့ဒေသကနေ လာရောက် ဆေးကုသနိုင်ဖို့ အထူးပြင်ဆင်ထားပြီး အခမဲ့ ကုသပေးမှာ ဖြစ်ပါတယ်။
ငလျင်ဒဏ် ခံရတဲ့ ဒေသကနေ လာရောက်တဲ့ ငလျင်ဘေးသင့်သူတွေကိုလည်း နေထိုင်စားသောက်ရေး အဆင်ပြေဖို့အတွက် စီစဉ်ထားတယ်လို့ ဆိုပါတယ်။
အထူးဒေသအတွင်းမှာရှိနေတဲ့ လူထုနဲ့အတူငလျင်ဒဏ် ခံနေရတဲ့ ဒေသကို ငွေကြေးအဝတ်အထည် အသုံးအဆောင်တွေကိုလည်း လှူဒါန်းနိုင်ဖို့ ဆောင်ရွက်နေပြီး ကယ်ဆယ်ရေးလုပ်ငန်းမှာ ပါဝင်နိုင်ဖို့ ဆောင်ရွက်တာ ရှိတယ်လို့ ထုတ်ပြန်ချက်ထဲ ထည့်သွင်းဖော်ပြထားပါတယ်။
လက်ရှိကာလအတွင်း စစ်ဘေးဒဏ်ကြောင့် ဒုက္ခရောက်နေကြရတဲ့အပြင် အခုလို သဘာဝကပ်ဘေးကြောင့် လူထုတွေရဲ့ ပျက်စီးဆုံးရှုံးမှု သေဆုံးမှုအပေါ် အထူးဒေသမှာရှိတဲ့ အစိုးရအဖွဲ့နဲ့ လူထုတွေက ကြေကွဲဝမ်းနည်းရပါကြောင်း၊ လူသားချင်းစာနာထောက်ထားမှုနဲ့ လိုအပ်တဲ့ အကူအညီတွေကို ပေးအပ်ဖို့ အသင့်ရှိတယ်လို့ ထုတ်ပြန်ချက်ထဲ ဆက်လက် ဖော်ပြထားပါတယ်။
