လွေးဇွန်မိုး၊ မတ်လ ၂၈ ရက်၊ လားရှိုး
မန္တလေး၊ စစ်ကိုင်းတိုင်းနဲ့ တခြားဒေသက ငလျင်ဒဏ်ကြောင့် ထိခိုက်ဒဏ်ရာရတဲ့ လူထုတွေအနေနဲ့ ကိုးကန့်တပ်- MNDAA ထိန်းချုပ်ထားတဲ့ လားရှိုး ပြည်သူ့ဆေးရုံမှာ အခမဲ့ လာကုနိုင်တယ်လို့ လားရှိုးပြန်လည်ထူထောင်ရေး တာဝန်ရှိသူတစ်ဦးက ပြောပါတယ်။
“အခုဒီအထူးဒေသ(၁) ကျန်းမာရေးဌာနကနေပြီးတော့ မန္တလေးတို့လို ငလျင်ဒဏ်ကြောင့် အပြင်းအထန် ခံစားရတဲ့ လူနာတွေကို ဒီလားရှိုးမှာ လာကုမယ်ဆိုရင် အခမဲ့ လာကုနိုင်တဲ့အကြောင်းပေါ့နော်။ အောက်ဘက် (အောက်ပြည်)ကလူတွေ အဓိက သိစေချင်တာပေါ့နော်။ လူနာအတွက် လိုအပ်တာတွေ ပြင်ဆင်ထားပေးတယ်ဗျ။ ကုသစရိတ်ကလည်း အခမဲ့ပါ”
ငလျင်ဒဏ်သင့်ဒေသက လူနာတွေကို ကူညီကယ်ဆယ်ဖို့ MNDAA ရဲ့ ကျန်းမာရေးဌာန၊ အခြားသက်ဆိုင်ရာဌာနနဲ့ လူမှုကူညီရေးအသင်းအဖွဲ့တွေက လူအင်အား၊ ဆေးပစ္စည်းနဲ့ သယ်သူပို့ဆောင်ရေးယာဉ်ကိုလည်း အဆင်သင့် ပြင်ဆင်ထားတယ်လို့ ဆိုပါတယ်။
ဒီနေ့ မတ်လ ၂၈ ရက် နေ့လယ် ၁၂ နာရီ ၅၁ မိနစ်မှာ မန္တလေးမြို့ အရှေ့မြောက်ဘက် ၂၀ ကီလိုမီတာခန့်အကွာကို ဗဟိုပြုပြီး ပြင်းအား ၇ ဒသမ ၇ အဆင့်ရှိ မြေငလျင်တစ်ခု လှုပ်ခတ်ခဲ့ပါတယ်။
မန္တလေးမြို့မှာ လက်ရှိအချိန်ထိ နောက်ဆက်တွဲ ငလျင်ငယ် ဆက်လှုပ်နေတာကြောင့် မြို့ခံတွေက လမ်းမကြီးဘေးမှာ ထွက်အိပ်နေရတယ်လို့ ဒေသတွင်း သတင်းဌာနတွေမှာ ဖော်ပြချက်အရ သိရပါတယ်။
ငလျင်ကြောင့် နိုင်ငံတစ်ဝှမ်းက အထပ်မြင့်အဆောက်အုံ၊ ဘာသာရေးကျောင်းနဲ့ သမိုင်းဝင် အဆောက်အအုံတချို့ ပြုကျတာတွေရှိသလို လူထု ထိခိုက်သေဆုံးတာနဲ့ ဒဏ်ရာရသူ များနေပြီး အရေအတွက်အတိအကျကိုတော့ မသိရသေးပါဘူး။
