မိုင်းပန်ပျော်၊ မတ်လ ၁၅ ရက်၊ နမ္မတူ
မန္တလေးတိုင်း ပြင်ဦးလွင်နဲ့ ရှမ်းမြောက် နောင်ချိုမြို့နယ်ကြား ပျောက်ဆုံးနေတဲ့ နမ္မတူမြို့က အမျိုးသားဟာ ပြီးခဲ့တဲ့ မတ်လ ၁၃ ရက် ညနေပိုင်းမှာ နေအိမ်သို့ ပြန်ရောက်လာပြီလို့ မိသားစုဝင်က ရွှေဖီမြေကို ပြောပါတယ်။
ပြီးခဲ့တဲ့ မတ်လ ၃ ရက်မှာ မန္တလေးကနေ အိမ်သို့ ပြန်လာတဲ့ အဲဒီအမျိုးသားဟာ တအာင်းတပ်ရဲ့ ဖမ်းဆီးထိန်းသိမ်းတာကို ခံခဲ့ရတာလို့ မိသားစုဝင်တစ်ဦးက ရွှေဖီမြေကို ပြောပါတယ်။
“၁၃ ရက် ညနေပိုင်း ပြန်ရောက်လာပြီ။ အန္တရာယ်ကင်းကင်းနဲ့ ပြန်ရောက်လာတယ်။ သူမန္တလေးကနေ ပြန်လာတဲ့အချိန် နောင်ချိုမှာ တိုက်ပွဲ ဖြစ်နေတော့ အဲနဲ့ အင်းဝိုင်းသကြားစက်ရုံနားမှာ TNLA က သူ့ကိုထိန်းသိမ်းထားတာ”
ပျောက်ဆုံးခဲ့တဲ့ အသက် ၃၅ နှစ်အရွယ် စိုင်းလောဝ်ဦးခေါ် စိုင်းအွတ်ဟာ ပြီးခဲ့တဲ့ ဖေဖော်ဝါရီ ၂၇ ရက်မှာ အလုပ်ကိစ္စနဲ့ မန္တလေးမြို့သို့ သွားရာကနေ အပြန်မှာ ဖမ်းဆီးထိန်းသိမ်းခံခဲ့ရတာပဲ ဖြစ်ပါတယ်။
ပြီးခဲ့တဲ့ ဖေဖော်ဝါရီ ၁၄ ရက်ကလည်း နောင်ချိုမြို့နယ် ခက်ချန်ရွာကနေ သုံးဆယ်ရွာဘက်သွားတဲ့ ကားသမား ၂ ဦးက ပျောက်ဆုံးသွားပြီး လက်ရှိအချိန်ထိလည်း မတွေ့သေးဘူးလို့ သိရပါတယ်။
