ပို့လဘား၊ ဇွန်လ ၂၆ ရက်၊ နောင်ချို
တအာင်းတပ်မတော် TNLA ထိန်းချုပ်ထားတဲ့ ရှမ်းမြောက် နောင်ချိုမြို့ပေါ်ကို စစ်ကောင်စီတပ်က လက်နက်ကြီးပစ်ခတ်တိုက်ခိုက်ခဲ့ပြီး နေအိမ်တချို့ထိခိုက်ပျက်စီးခဲ့တယ်လို့ စစ်မြေပြင်အခြေအနေသိရှိသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဇွန်လ ၂၅ ရက်မှာ စစ်ကောင်စီတပ်က ကံကြီးကျေးရွာကနေ နောင်ချိုမြို့ နယ်မြေ ၉ ဈေးရပ်ကွက်ဘက်မှာ ပစ်ခတ်ခဲ့တာ ဖြစ်တယ်လို့ ပြောပါတယ်။
“မနေ့ည သူတို့ပစ်လာတယ် ၅လုံး၊၆ လုံး။ ဒီမနက်လည်း ၆ လုံးလောက်သူတို့ပစ်လာတယ်။ ဈေးရပ် ကျောက်ဂူတောရကျောင်းရဲ့ အနောက်ဘက်က အိမ်ဝန်းတစ်လုံးကျတယ်။ သူတို့ရဲ့ မီးဖိုချောင်မှာ ကျတယ်” လို့ အထက်ပါအမျိုးသားက ပြောပါတယ်။
နောင်ချိုမြို့ နောင်လင်၊ နောင်အော၊ လုံစံနဲ့ နောင်ဖောကျေးရွာတွေကို စစ်ကောင်စီတပ်နဲ့ TNLA တို့အကြား တိုက်ပွဲဆက်လက်ဖြစ်ပွားနေပြီး စစ်ကောင်စီတပ်က ဒရုန်းနဲ့ ၂၈ လုံး၊ လက်နက်ကြီး ၆၈ လုံး ပစ်ကူတိုက်ခိုက်ခဲ့တယ်လို့ TNLA က ထုတ်ပြန်ထားပါတယ်။
ဒါ့အပြင် မနေ့ ဇွန်လ ၂၅ ရက်မှာ နောင်ချိုမြို့ နောင်လင်ကျေးရွာကိုလည်း စစ်ကောင်စီတပ်က ဒရုန်းနဲ့ ဗုံး ၁၄ လုံး၊လက်နက်ကြီး ၅၄ လုံး ပစ်ကူတိုက်ခိုက်ခဲ့တယ်လို့ တအာင်းတပ်ဘက်က ဒီနေ့ရက်စွဲနဲ့ ထုတ်ပြန်ပါတယ်။
အလားတူ မနေ့ ဇွန်လ ၂၅ ရက် ည ၁၁ နာရီအချိန်မှာလည်း မိုးကုတ်မြို့ အရှေ့ပိုင်းမှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခံရပြီး ဒေသခံ ၄ဦး ထိခိုက်ဒဏ်ရာရရှိခဲ့သလို ပြီးခဲ့တဲ့ ဇွန်လ ၂၄ရက်ကလည်း ကျောက်မဲမြို့ပေါ်ကိုာလေကြောင်းကနေ ဗုံးကြဲလို့ အရပ်သား ၄ဦး သေဆုံးပြီး ၁၄ဦးထက်မနည်း ဒဏ်ရာရခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
