မိုင်းအရှိုင်း၊ မေလ ၃၀ ရက်, နောင်ချို
TNLA ပြန်လက်လွှတ်ခဲ့ရတဲ့ နောင်ချိုမြို့နယ် သရက်ချိုတပ်စခန်းကနေ နောင်တောကျေးရွာဘက်ကို စစ်ကောင်စီတပ်က လက်နက်ကြီးပစ်ခတ်တာကြောင့် အသက် ၆၃ အရွယ် ဦးစိန်လွင်ကို လက်နက်ထိမှန်ပြီး ပွဲချင်းပြီးသေဆုံးသွားခဲ့တယ်လို့ အမည်မဖော်လိုတဲ့ ဒေသခံတစ်ဦးက ရွှေဖီမြေကိုပြောပါတယ်။
“စစ်ကောင်စီက နောင်တောရွာအတွင်းကို ဟောင်ဝှစ်ဇာ လက်နက်ကြီးနဲ့ပစ်ခတ်တိုက်ခိုက်နေတယ်။ ပြည်သူတစ်ဦး လက်နက်ကြီးစ ထိမှန်ပြီး သေသွားတယ်”
ဖြစ်စဉ်က ဒီနေ့ မနက်ပိုင်း ၁၁ နာရီ ဝန်းကျင်မှာ ဖြစ်ပွားခဲ့ပြီး သေဆုံးသွားသူဟာ နောင်တောကျေးရွာ အနောက်ကုန်းမှာ နေထိုင်သူတစ်ဦးဖြစ်သလို အိမ်မှာ သားသမီး ၆ ယောက်ရှိသူတစ်ဦးဖြစ်တယ်လို့ ဒေသခံတစ်ဦးက ရွှေဖီမြေကို ဆက်ပြောပါတယ်။
သရက်ချိုကို စစ်ကောင်စီတပ်က TNLA ထံ ပြီခဲ့တဲ့ မေလ ၂၀ ရက်မှာ အင်အားအလုံးအရင်းနဲ့ထိုးစစ်ဆင် သိမ်းပိုက်ရယူခဲ့ပြီး သရက်ချိုနဲ့ ၃ မိုင်ခန့် အကွာအဝေးရှိတဲ့ နောင်တောကို ဆက်လက်တိုက်ခိုက်နေပါတယ်။
စစ်ကောင်စီတပ်က မေလ အစောပိုင်းမှာ အပစ်အခတ်ရပ်စဲခြင်းကို ၁ လ ထပ်တိုးကြောင်းထုတ်ပြန်ခဲ့သလို မနေ့ မေလ ၂၉ ရက်မှာလည်း ငလျင်ဘေးသင့် ပြည်သူများကို ရှေးရှုပြီကာ တိုင်းရင်းသားလက်နက်ကိုင်အဖွဲ့အစည်းများအနေနဲ့ ယာယီအပစ်ရပ်စဲခြင်း ကြေညာထားတာကို အလေးထားလိုက်နာဆောင်ရွက်ဖို့ ထပ်မံပြောဆိုခဲ့ပါသေးပါတယ်။
အပစ်ရပ်ကြောင်းကြေညာထားတဲ့ ကာလအတွင်းမှာပဲ စစ်ကောင်စီတပ်က တောင်းခမ်းကနေ TNLA ရှိရာ နောင်လင်၊ သရက်ချို၊ ယာပြင်၊ ရွှေမုဌောစတဲ့ တပ်စခန်းတွေကို ထိုးစစ်ဆင်သိမ်းပိုက်လိုက်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
