မိုင်းရူပ၊ နိုဝင်ဘာ ၂၀ ရက် ၊ လားရှိုး
စစ်ကောင်စီတပ် ပြန်ထိန်းချုပ်ထားတဲ့ ရှမ်းမြောက် လားရှိုးမြို့မှာ စစ်ကောင်စီက တက္ကသိုလ်ကျောင်းကို ပြန်ဖွင့်မယ်လို့ လားရှိုးမြို့ခံတွေဆီက သိရပါတယ်။
လားရှိုးတက္ကသိုလ်ကို လာမယ့် နိုဝင်ဘာ ၂၄ ရက်မှာ စစ်ကောင်စီက ပြန်ဖွင့်မှာဖြစ်ပြီး ပြီးခဲ့တဲ့ နိုဝင်ဘာ ၁၇ ရက်ကစပြီး ကျောင်းအပ်လက်ခံနေပြီလို့ လားရှိုးမြို့ခံ အမျိုးသားတစ်ဦးက ရွှေဖီမြေသို့ ပြောပါတယ်။
“လားရှိုးတက္ကသိုလ် ပြန်ဖွင့်မယ်။ ပျက်သွားတဲ့ နေရာတွေကိုလည်း ပြန်ပြင်နေပြီ။ ကျောင်းပြန်ဖွင့်မယ့်ရက်ကို လားရှိုးတက္ကသိုလ် အရှေ့တံခါးပေါက်မှာပါ အနောက်ပေါက်မှာပါ ကပ်ထားတယ်” လို့ ၎င်းက ဆိုပါတယ်။
လားရှိုးက တက္ကသိုလ်ကျောင်းတွေကို ပြီးခဲ့တဲ့ ၁၀၂၇ စစ်ဆင်ရေး ဒုတိယလှိုင်းစကတည်းက ပိတ်ထားရတာဖြစ်ပြီး ကိုးကန့်နဲ့ စစ်ကောင်စီတို့အကြား တိုက်ပွဲကြောင့် ကျောင်းဆောင်တွေ အများအပြားလည်း လက်နက်ကြီး ထိမှန်ပျက်စီးခဲ့ပါတယ်။
တရုတ်ရဲ့ ကြားဝင်မှုနဲ့ ကိုးကန့်တပ် ထိန်းချုပ်ထားတဲ့ လားရှိုးမြို့ကို ပြီးခဲ့တဲ့ ဧပြီလကုန်မှာ စစ်ကောင်စီ ပြန်ထိန်းချုပ်ပြီးနောက် ၇ လကျော်အကြာမှာပဲ လားရှိုးက တက္ကသိုလ်ကျောင်းတွေကို ပြန်လည်ဖွင့်လှစ်ဖို့ ပြင်ဆင်တာဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
