ပို့လဘား၊ ဇူလိုင် ၁၁ ရက်၊ မူဆယ်
စစ်ကောင်စီတပ် ထိန်းချုပ်ထားတဲ့ ရှမ်းမြောက် တရုတ်- မြန်မာနယ်စပ် မူဆယ်မြို့မှာ တရုတ်ဖိအားကြောင့် စစ်ကောင်စီတပ်က ကျားဖြန်တွေကို ဖမ်းဆီးမှုတွေ လုပ်ပြနေတယ်လို့ မူဆယ်မြို့ခံ အမျိုးသမီးတစ်ဦးက ရွှေဖီမြေကို ပြောပါတယ်။
ဒီနေ့ ဇူလိုင် ၁၁ ရက် မနက် ၆ နာရီဝန်းကျင်မှာ မူဆယ်မြို့ ဖူလီလိုက်အပေါ်ဘက်မှာရှိတဲ့ ကျားဖြန်ကုမ္ပဏီတစ်ခုကို စစ်ကောင်စီတပ်က လာရောက်ဝန်းရံထားပြီး ကျားဖြန်လုပ်ကိုင်သူတွေကို ဖမ်းဆီးမှုတွေ ပြုလုပ်နေတာလို့ ပြောပါတယ်။
“ဘယ်လောက်ဖမ်းလဲတော့မသိရသေးဘူး။ သူတို့လာဝိုင်းတာပဲရှိတယ်။ သူတို့လာတဲ့အချိန်နဲ့ သတင်းက ကြိုရထားတော့ ပြေးကုန်ကြပြီလေ။ အပေါ်မှာ လူနည်းနည်းပါးပါးပဲရှိတော့မယ်။ တိုက်အမိုးပေါ်မှာ နေတဲ့သူတွေပဲကျန်မယ် ။ အဲဒီကုမ္မဏီမှာ မြန်မာက လူတွေလုပ်နေတာ။ မြန်မာက တရုတ်စကားမတတ်တဲ့မြန်မာလူမျိူးတွေပဲ များတယ်။ သူတို့ကိုဖမ်းမိရင်လည်း ဖုန်းတွေအကုန်သိမ်း၊ ရဲစခန်းမှာလည်း ၆လလောက် နေရပြီး ပြန်လွှတ်ပေးတာရှိတယ်။ ပိုက်ဆံရှိတဲ့သူလည်း တရုတ်ယွမ် ၂သောင်း ၃ သောင်းနဲ့ ပြန်ရွေးတယ်” လို့ အထက်ပါ အမျိုးသမီးက ဆိုပါတယ်။
ပြီးခဲ့တဲ့ ဇွန်လ ၁၆ ရက်မှာ မူဆယ်မြို့ရှိ စွမ်စော်နဲ့ ကောင်းမှုတုံရပ်ကွက်ရှိ ကျားဖြန်တွေကို စစ်ကောင်စီတပ်က ဝင်ရောက်ဖမ်းစီးခဲ့ရာ တရုတ်နိုင်ငံသား ၄၁ ဦးနဲ့ မြန်မာနိုင်ငံသား ၉၂ ဦး ဖမ်းပြခဲ့ပါတယ်။
မူဆယ်မြို့က အွန်လိုင်းငွေလိမ်လုပ်ငန်း(ကျားဖြန်)လုပ်ကိုင်သူတွေထဲမှာ တရုတ်နိုင်ငံသားအပါအဝင် မြန်မာနိုင်ငံသား ၅သောင်းနီးပါးလည်း ပါဝင်လုပ်ကိုင်နေကြတယ်လို့ မူဆယ်မြို့မ ရဲစခန်းရှိ ရဲဝန်ထမ်းတစ်ဦးက ရွှေဖီမြေကို ပြောဆိုထားဖူးပါတယ်။
စစ်ကောင်စီတပ်ကတော့ တရုတ်ဘက်က ဖိအားပေးလာရင် အခုလို ဖမ်းဆီးမှုတွေ ပြုလုပ်လေ့ရှိပြီး ဖမ်းဆီးရာမှာလည်း အခွန်ရှောင်သူတွေကိုသာ အဓိက ဖမ်းဆီးနေတာ ဖြစ်ပါတယ်။
အချို့ ကျားဖြန်ကုမ္မဏီတွေကိုတော့ ဖမ်းဆီးမယ့်အကြောင်း သတင်းအရင်ပေးပို့ပြီးမှသာ ဝင်ရောက်စစ်ဆေးလေ့ရှိတာ ဖြစ်တယ်လို့ ရွှေဖီမြေရဲ့ သတင်းအရင်းမြစ်တွေက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
