မိုင်းရူပ၊ ဧပြီ ၂၂ ရက်၊ နောင်ချို
အပစ်ရပ်သက်တမ်း ထပ်တိုးထားတဲ့ စစ်ကောင်စီတပ်ဟာ ရှမ်းမြောက် နောင်ချိုမြို့နယ် အုမ္မတီးရွာကို လေကြောင်းနဲ့ တိုက်ခိုက်ခဲ့တယ်လို့ တအာင်းတပ်မတော်- TNLA က ထုတ်ပြန်လာပါတယ်။
ဒီနေ့ ဧပြီ ၂၂ ရက် မနက် ၁၀ နာရီခွဲဝန်းကျင်မှာ စစ်တပ်ဟာ အုမ္မတီးရွာထဲ ဂျက်ဖိုက်တာနဲ့ ဗုံး ၂ လုံး ကြဲချတိုက်ခိုက်ခဲ့ရာ နေအိမ် ၅ လုံး ထိခိုက်ပျက်စီးခဲ့တယ်လို့ ဆိုပါတယ်။
အုမ္မတီးရွာထဲ စစ်တပ်နဲ့ TNLA တို့ တိုက်ပွဲ ဆက်လက် ပြင်းထန်နေတယ်လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“ဂျက်ဖိုက်တာနဲ့ ၁၀ နာရီ ၂၉ မိနစ်မှာတစ်ကြိမ် ၁၀ နာရီ ၃၂ မိနစ်တစ်ကြိမ် လာပစ်သွားတယ်။ တိုက်ပွဲက အုမ္မတီးရွာထဲမှာ ပြင်းထန်နေတယ်”
မနေ့ ဧပြီ ၂၁ ရက်က တောင်းခမ်းရှိ အမြှောက်တပ်စခန်း ကွပ်ကဲမှုဌာနချုပ် ၉၀၂ တိုက်ပွဲမှာ စစ်တပ်ဘက်က အဆိပ်ငွေ့ဗုံး အသုံးပြုတိုက်ခိုက်ခဲ့ပြီး TNLA ရဲဘော် ၁၀ ဦး ဒဏ်ရာရကာ ၃ ဦး ဒဏ်ရာ ပြင်းထန်ကြောင်း TNLA က ထုတ်ပြန်ထားပါတယ်။
ဒီနေ့ဟာ စစ်ကောင်စီရဲ့ ၃ ပတ်ကြာ အပစ်ရပ်သက်တမ်း ပြည့်တဲ့နေဖြစ်ပြီး ဧပြီ ၃၀ ရက်အထိ သက်တမ်း ထပ်တိုးလိုက်ကြောင်း စစ်ကောင်စီက ဒီနေ့မှာ ထုတ်ပြန်လာပါတယ်။
စစ်တပ်ဟာ အပစ်ရပ်မယ်လို့ ကြေညာထားပေမဲ့ တော်လှန်ရေးတပ်တွေ ထိန်းချုပ်ထားတဲ့ ဒေသကို လေကြောင်းနဲ့ တိုက်ခိုက်တာ ထိုးစစ်ဆင်တာတွေ ဆက်တိုက် လုပ်ဆောင်နေပါတယ်။
