ပပ၊ ဇွန်လ ၂၃ ရက်၊ နောင်ချို
ပြင်ဦးလွင်နဲ့ နောင်ချိုကြားမှာရှိတဲ့ စစ်ကောင်စီတပ်ရဲ့ စစ်ဆေးရေးဂိတ်ဖြစ်တဲ့ ဝက်ဝံဂိတ်မှာ ဖြတ်သန်းသွားလာတဲ့ ကုန်တင်ယာဉ်တွေထံ ငွေကျပ် သိန်း ၃၀၀ အထိ တောင်းခံကြောင်း ကားမားတွေထံက သိရပါတယ်။
ဇွန်လ ၂၀ ရက် ည ၇ နာရီ ဝန်းကျင်မှာ နောင်ချိုမှ ဆင်းလာတဲ့ ဘီလပ်မြေတင်ယာဉ်၊ ကုန်မာနဲ့ အိမ်သုံးကုန်အမျိုးမျိုး တင်လာတဲ့ တွဲကား၊ ၁၀ ဘီးနဲ့ ၆ ဘီး စတဲ့ ယာဉ်တွေကို တရားမဝင်ကုန် တင်ဆောင်ကြောင်း ပြောဆိုပြီး ငွေတောင်းခဲ့တာဖြစ်ပါတယ်။
ကားသမားတစ်ဦးက “အဲလောက်မဖြစ်နိုင်တဲ့ ပိုက်ဆံကိုမှ တောင်းနေတာကွာ။ ဘယ်လိုလုပ် ပေးနိုင်မှာလဲ။ အဲဒါနဲ့ ဟိုပြောဒီပြောနဲ့ နောက်ဆုံးတော့ သိန်း ၃၀ နဲ့ ဖြတ်လာခဲ့ရတာ။ တချို့မသိတဲ့လူဆို တကယ်ပေးခဲ့ရတာတွေ ရှိတယ်” လို့ ပြောပါတယ်။
၎င်းဝက်ဝံဂိတ်ရှိ စစ်ကောင်စီတပ်သားတွေဟာ မူးယစ်ဆေးဝါး သောက်စားပြီး ညအချိန် ဖြတ်သန်းသွားလာတဲ့ ကုန်တင်ယာဉ်နဲ့ ခရီးသည်ယာဉ်တွေကို စစ်ဆေးမေးမြန်းတာ၊ ငွေတောင်းတာတွေရှိနေကြောင်း အထက်ပါအမျိုးသားက ဆိုပါတယ်။
ဒါ့အပြင် ၎င်းတို့ တောင်းတဲ့ငွေတွေကို မပေးနိုင်တဲ့ ကားသမားတချို့လည်း ဖမ်းဆီးခံနေရတာရှိကြောင်း နောက်ထပ် ကားသမားတစ်ဦးက ဆိုပါတယ်။
”အဲနေ့က ပုံမှန်ထက်ပို အစစ်ကြမ်းတယ်။ ဘာရှိလို့လဲတော့ မသိရဘူး။ အသိကား ၂ စီး ခေါ်ထားခံရတယ်။ ခရီးသည်ကားနဲ့ လိုက်တဲ့ ခရီးသည်တွေလည်း ခေါ်ထားခံရတယ်” လို့ ပြောပါတယ်။
ပြီးခဲ့တဲ့ ဇွန်လ ၁၆ ရက်ကလည်း ၎င်းနေရာမှာ လားရှိုးမှ ခရီးသည်တင်ကားတစ်စီး ဖမ်းဆီးခံခဲ့ရကြောင်း ခရီးသည်တွေကဆိုပေမဲ့ ရွှေဖီမြေက သီးခြားအတည်မပြုနိုင်ပါဘူး။
အလားတူ ဖြစ်စဉ်မျိုး ၎င်းဂိတ်မှာ မကြာခန ဖြစ်ပွားနေတာကြောင့် ခရီးသွားတွေ အခက်ကြုံနေရကြောင်း ခရီးသည်တွေနဲ့ ကားသမားတွေက ရွှေဖီမြေကို ပြောဆိုထားဖူးပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
