မိုင်းရူပ၊ စက်တင်ဘာ ၁၆ ရက်၊ လားရှိုး
စစ်ကောင်စီတပ် ပြန်ထိန်းချုပ်ထားတဲ့ ရှမ်းမြောက် လားရှိုးမြို့ ဆင်နှစ်ကောင်ဟိုတယ်မှာ စစ်ကောင်စီနဲ့ ကိုးကန့်တပ်မတော် (MNDAA)တို့ ဒီနေ့ စက်တင်ဘာ ၁၆ ရက်မှာ ထပ်မံတွေ့ဆုံ ဆွေးနွေးနေတယ်လို့ သိရပါတယ်။
“မနက် ၁၀ နာရီဝန်းကျင်မှာ ကိုးကန့်ယာဉ်တန်းတွေ လားရှိုးထဲ ဝင်လာတာ တွေ့တယ်။ ကား ၇ စီးလောက် ရှိမယ်။ လုံခြုံရေးတွေလည်း ပါတယ်။ ဆင်နှစ်ကောင်မှာ စစ်ကောင်စီနဲ့ တွေ့မယ်လို့ ကြားတယ်” လို့ လားရှိုးဒေသခံ အမျိုးသားတစ်ဦးက ရွှေဖီမြေကို ပြောပါတယ်။
နောက်ထပ် လားရှိုးဒေသခံတစ်ဦးကလည်း လားရှိုးမြို့ ဆင်နှစ်ကောင်ဟိုတယ်မှာ စစ်ကောင်စီနဲ့ ကိုးကန့်တပ်အကြား တွေ့ဆုံဆွေးနွေးနေတာ မှန်ကန်ကြောင်း ရွှေဖီမြေကို အတည်ပြု ပြောဆိုပါတယ်။
လားရှိုးမြို့ကို ကိုးကန့်တပ်က စစ်ကောင်စီတပ်ထံ ပြန်လွှဲပြောင်းပြီးနောက် ဆင်နှစ်ကောင်ဟိုတယ်မှာ MNDAA နဲ့ စစ်ကောင်စီတပ်အကြား မကြာခဏ တွေ့ဆုံတာတွေရှိနေပေမယ့် ဆွေးနွေးမှု အသေးစိတ်ကို မသိရသေးပါဘူး။
ဆွေးနွေးပွဲမှာ စစ်ကောင်စီဘက်က ကိုးကန့်တပ် ထိန်းချုပ်ထားတဲ့ သိန္နီမြို့ကို ပြန်ပေးဖို့ ဆွေးနွေးနေတယ်လို့ သတင်းတွေ ထွက်ပေါ်နေပြီး နှစ်ဖက်တပ်က တစုံတရာ သတင်းထုတ်ပြန်ထားတာ မရှိသေးပါဘူး။
တစ်ဖက်မှာလည်း လာမယ့်ရက်ပိုင်းအတွင်း သိန္နီမြို့ထဲကို စစ်ကောင်စီရဲ့ ဌာနဆိုင်ရာ ဝန်ထမ်းတွေ ဝင်လာမယ်လို့ သတင်းတွေ ထွက်ပေါ်နေပေမယ့် သိန္နီမြို့နယ်မှာ ရွေးကောက်ပွဲ မကျင်းပနိုင်ကြောင်း စစ်ကောင်စီက ထုတ်ပြန်ထားပါတယ်။
တရုတ်နိုင်ငံရဲ့ ကြားဝင် စေ့စပ်မှုကြောင့် ကိုးကန့်တပ်မတော် (MNDAA) ထိန်းချုပ်ထားတဲ့ လားရှိုးမြို့ပေါ်က နေရာတွေကို ပြီးခဲ့တဲ့ ဧပြီလထဲမှာ စစ်ကောင်စီထံ ပြန်လည် လွှဲပြောင်းပေးခဲ့ရတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
