ယာရူစိင်၊ မတ်လ ၃ ရက်၊ နမ္မတူ
ရှမ်းမြောက် နမ္မတူမြို့နယ်မှာ အမျိုးသားတစ်ဦး ပျောက်ဆုံးပြီး ၆ ရက်အကြာမှာတော့ သေဆုံးနေတဲ့ အလောင်းကိုသာ ပြန်လည်တွေ့ရှိခဲ့တယ်လို့ စုံစမ်းသိရပါတယ်။
အသက် ၇၅ နှစ်အရွယ် ဦးအောင်ဆွေဟာ ပြီးခဲ့တဲ့ ဖေဖော်ဝါရီ ၂၆ ရက်မှာ ပျောက်ဆုံးခဲ့တာဖြစ်ပြီး မတ်လ ၃ ရက် မနက် ၁၁ ခွဲအချိန်မှာတော့ နမ္မတူမြို့မှာရှိတဲ့ တောင်ယာဟောင်း ချောက်ကမ်းပါးမှာ အလောင်း တွေ့ရှိခဲ့တယ်လို့ ဦးအောင်ဆွေရဲ့ ညီမဖြစ်သူက ရွှေဖီမြေကို ပြောပါတယ်။
“သူက တောထဲဘဲ သွားတတ်တာ ဘယ်မှမသွားတတ်ဘူး မြို့ထဲလဲ သူမသွားတတ်ဘူး။ ဒီနေ့ မနက်ကျ ဦးလေးတစ်ယောက်က ပြောလာတာ ချောက်ကမ်းပါးထဲမှာ နင့်အကို ပြုတ်ချပြီး သေနေတာတဲ့။ ကျမတို့ သွားကြည့်တော့ ဟုတ်တယ် သူဆိုတာ သေချာတယ်ပေါ့နော်။ သူက ကျန်းမာရေးလဲ မကောင်းဘူး။ သူ့ရဲ့ ရုပ်အလောင်းမှာ ဘာဒဏ်ရာမှ ရထားတာမရှိဘူး ချော်လှဲပြီး ကျသွားတယ်လို့တော့ သုံးသပ်လို့ ရတယ်ပေါ့”
ဦးအောင်ဆွေဟာ အရင်တုန်းကလည်း မကြာခဏ နေအိမ်ကနေ ထွက်သွားပြီး ပျောက်ဆုံးခဲ့ဖူးတယ်လို့ မိသားစုဝင်တွေ ပြောပြချက်အရ သိရပါတယ်။
သေဆုံးသွားတဲ့ အမျိုးသားအလောင်းကို နမ္မတူမြို့ရှိ မေတ္တာရှင် လူမှုကူညီရေးအသင်းက သွားရောက်သယ်ဆောင်ပေးခဲ့တယ်လို့ သိရပါတယ်။
လက်ရှိမှာ နမ္မတူမြို့ကို တအာင်းတပ်က ထိန်းချုပ်ထားတာဖြစ်ပြီး ပြီးခဲ့တဲ့ ၂၀၂၃ ခုနှစ် ဒီဇင်ဘာ ၂၈ ရက်မှာ တအာင်းတပ်က အပြီးသတ်သိမ်းပိုက်နိုင်ခဲ့တာပဲ ဖြစ်ပါတယ်။
