မိုင်းရူပ၊ ဇွန်လ ၆ ရက်၊ နောင်ချို
တအာင်းတပ်မတော် TNLA ထိန်းချုပ်ထားတဲ့ ရှမ်းမြောက် နောင်ချိုမြို့အနီးအထိ တိုက်ပွဲတွေ ရောက်လာတာကြောင့် မြို့အနီးရှိ ကျေးရွာ ၈ ရွာက ဒေသခံတွေ ထွက်ပြေးတိမ်းရှောင်နေရတယ်လို့ ဒေသခံတွေက ရွှေဖီမြေကို ပြောပါတယ်။
ဇွန်လ ၄ ရက်ကစပြီး နောင်ချိုမြို့နယ် ရွှေမုဌောကျေးရွာကနေ တအာင်းတပ် တည်ရှိတဲ့ ကံကြီးနဲ့ ရှောက်ခြုံကျေးရွာတွေထဲကို စစ်ကောင်စီတပ်က ထိုးစစ်ဆင်တိုက်ခိုက်နေပြီး မနေ့ ဇွန်လ ၅ ရက်မှာ ကံကြီးရွာအနီး တိုက်ပွဲပြင်းထန်နေတယ်လို့ ဆိုပါတယ်။
“စစ်ကောင်စီက ကံကြီးကိုရဖို့ကို ထိုးနေတာ။ အခု ကံကြီးရွာအပြင်မှာ ရောက်နေတယ်။ ရွာထဲအထိတော့ မရောက်သေးဘူး။ အဲအနီးက ဒေသခံတွေတော့ ပြေးကုန်ပြီ” လို့ ဆိုပါတယ်။
ထွက်ပြေးတိမ်းရှောင်နေရတဲ့ ကျေးရွာတွေထဲမှာ ရွှေမုဌော၊ ကံကြီး၊ နောင်လိတ်၊ နောင်တော၊ မက်မန်းတော၊ လက်ပန်ကုန်း၊ ညောင်ပင်သာနဲ့ သရက်ကုန်း စတဲ့ကျေးရွာက ဒေသခံတွေပဲ ဖြစ်ပါတယ်။
နောင်ချိုမြို့အတွင်းရှိ ဒေသခံတွေတချို့လည်း ထွက်ပြေးတိမ်းရှောင်နေတာတွေရှိနေပြီး အများစုဟာ ကျောက်မဲမြို့နယ်ဘက်ကို ထွက်ပြေးတိမ်းရှောင်ခဲ့ကာ နောင်ချိုမြို့အနီး ဒေသခံတွေအပါအဝင် ထွက်ပြေးတိမ်းရှောင်နေရတဲ့ ဒေသခံ ထောင်နဲ့ချီ ရှိနိုင်ပါတယ်။
ဇွန်လ ၄ ရက် နေ့လယ်ပိုင်းမှာ စစ်တပ်ပစ်ခတ်တဲ့ လက်နက်ကြီးကြောင့် နောင်ချိုမြို့ စျေးရပ်ကွက်ရှိ အမျိုးသမီး ၂ ဦးနဲ့ အမျိုးသား ၂ ဦး ထိခိုက်ဒဏ်ရာရခဲ့ပါတယ်။
စစ်ကောင်စီ ထိုးစစ်ဆင်နေတဲ့ ကံကြီးကျေးရွာဟာ TNLA ထိန်းချုပ်ထားတဲ့ နောင်ချိုမြို့နဲ့ ၇ မိုင်ဝန်းကျင်လောက်သာ ကွာဝေးတော့တယ်လို့ သိရပါတယ်။
PSLF/TNLA ရဲ့ ပြောရေးဆိုခွင့်ရှိသူ လွေးယေဦးကတော့ နောင်ချိုမြို့နယ်မှာ တိုက်ပွဲတွေ ဖြစ်ပွားနေတာကြောင့် လူထုတွေအနေနဲ့ လုံခြုံရေး အထူးဂရုစိုက်ဖို့ လိုအပ်ကြောင်း မနေ့ ဇွန်လ ၅ ရက်မှာ ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
