မိုင်းပန်ပျော်၊ ဧပြီ ၆ ရက်၊ လားရှိုး
ရှမ်းမြောက် လားရှိုးမြို့ကနေ ဆုက်ခွာတော့မယ့် ကိုးကန့်တပ်မတော်- MNDAA ဟာ ရပ်ကွက်တွေထဲက အိမ်ထောင်စုစာရင်းမိတ္တူတွေ အိမ်တိုင်း လိုက်ကောက်နေတာကြောင့် တပ်သားသစ် စုဆောင်းခံရမှာကို စိုးရိမ်နေတယ်လို့ ဒေသခံတွေက ရွှေဖီမြေကို ပြောပါတယ်။
ဧပြီ ၄ ရက်ကစပြီးတော့ MNDAA ရဲ့ ရပ်ကွက်မှူးနဲ့ နယ်မြေမှူး ဦးဆောင်ကာ အိမ်ထောင်စုမိတ္တူ ကောက်ခိုင်းပြီး ဘာကြောင့် ကောက်တယ်ဆိုတာကို ဒေသခံတွေက မရှင်းမလင်း ဖြစ်နေတဲ့အတွက် တပ်သားသစ် စုဆောင်းခံရမှာကို စိုးရိမ်နေတယ်လို့ လားရှိုးမြို့ ရပ်ကွက် ၁၀ မှာ နေထိုင်တဲ့ အမျိုးသားတစ်ဦးက ရွှေဖီမြေကို ပြောပါတယ်။
“ကိုးကန့်က ရပ်ကွက်ထဲမှာ အိမ်ထောင်စုမိတ္တူ လာတောင်းတာ သူတို့ကိုယ်တိုင်တော့မဟုတ်ဘူး။ နယ်မြေမှူးတွေ ရပ်ကွက်မှူးတွေက လာတောင်းတာ။ မပေးမနေရတဲ့။ တချို့အိမ်ထောင်စုက ရွာမှာ အဲဒါလည်း မရဘူး။ ပြန်သွားယူခိုင်းတယ်။ သူတို့ဘာလုပ်ဖို့လဲမသိဘူး။ လားရှိုးကနေလည်း ဆုတ်တော့မယ်။ သူတို့ လားရှိုးမှာ နေမယ်ဆိုရင်တော့ တစ်မျိုးပေါ့နော်။ စိုးရိမ်ကတော့ ဒီရက်ပိုင်းက သူတို့တပ်သား စုဆောင်းတယ်လို့ ကြားထားတော့ အိမ်ထောင်စု ကောက်ပြီး စစ်မှုထမ်း ကောက်သွားမှာကို စိုးရိမ်တယ်”
လားရှိုးမြို့မှာ အိမ်ထောင်စုမိတ္တူတွေ ကောက်နေတာနဲ့ ပတ်သက်ပြီး ရွှေဖီမြေက လားရှိုးမြို့ ပြန်လည်ထူထောင်ရေးအဖွဲ့ထံ ဆက်သွယ်မေးမြန်းရာ ဒီကိစ္စနဲ့ပတ်သက်ပြီး မသိရှိရသေးဘူးလို့ ပြောပါတယ်။
လာမယ့် ဧပြီ ၂၁ ရက်မှာ MNDAA က လားရှိုးမြို့ကို စစ်ကောင်စီထံ လွှဲပြောင်းပေးသွားမယ်လို့ သတင်း ထွက်ပေါ်နေပြီး အုပ်ချုပ်ရေးကို ဘယ်လို ဆောင်ရွက်သွားမလဲဆိုတာကတော့ ဘယ်ဘက်ကမှ တရားဝင် ထုတ်ပြန်တာ မရှိသေးပါဘူး။
