မိုင်းရူပ၊ မတ်လ ၂၈ ရက်၊ လားရှိုး
ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့ထဲ စစ်ကောင်စီတပ် ပြန်ဝင်လာမှာကို စိုးရိမ်နေတယ်လို့ ဒေသခံတွေက ရွှေဖီမြေကို ပြောပါတယ်။
ပြီးခဲ့တဲ့ ဇန်နဝါရီလထဲ ကိုးကန့်တပ်နဲ့ စစ်ကောင်စီတပ်အကြား အပစ်ရပ်ဖို့ သဘောတူခဲ့ပြီးနောက် လားရှိုးမြို့ကနေ ကိုးကန့်တပ် ပြန်ဆုတ်ပေးရမယ်ဆိုတဲ့သတင်း ထွက်ပေါ်ခဲ့တာပဲ ဖြစ်ပါတယ်။
ပြီးခဲ့တဲ့ မတ်လ ၂၂ ရက်မှာ စစ်ကောင်စီနဲ့ MNDAA အကြား ထပ်မံ တွေ့ဆုံခဲ့ပေမဲ့ သဘောတူညီချက် မရဘူးလို့ ကိုးကန့်တပ်နဲ့ နီးစပ်သူတစ်ဦးက ရွှေဖီမြေကို ပြောပါတယ်။
“ဆွေးနွေးချက်ရဲ့အဖြေကို ဟိုဘက်ရော ဒီဘက်ရော မထုတ်ပြန်ဘူးပေါ့။ ဆွေးနွေးပွဲက အဆင်မပြေဘူးလို့ ကြားရတယ်”
လားရှိုးဒေသခံတစ်ဦးကတော့ လားရှိုးမြို့ထဲ စစ်တပ် ပြန်ဝင်လာမှာကို ဒေသခံအများစုက စိုးရိမ်နေကြတယ်လို့ ဆိုပါတယ်။
“တော်တော်များများကတော့ ပြန်မပေးစေချင်ဘူ။ အဓိကတော့ စစ်မှုထမ်းခံရမှာ ကြောက်တာရယ်။ သူတို့ ဝင်လာရင် ဖိနှိပ်ခံရမှာ ကြောက်တာပါတာပေါ့လေ”
ဒါ့အပြင် စစ်တပ်နဲ့ MNDAA အကြား ဆွေးနွေးမှု မအောင်မြင်တာကြောင့် လေကြောင်း တိုက်ခိုက်မှု ပြန်လုပ်မှာကို ဒေသခံတွေ စိုးရိမ်နေတယ်လို့ သူက ဆက်ပြောပါတယ်။
နှစ်ဖက်တပ်အကြား ဆွေးနွေးမှုနဲ့ ပတ်သက်ပြီး စစ်ကောင်စီနဲ့ MNDAA ဘက်က တရားဝင် ထုတ်ပြန်ထားတာ မရှိသေးပါဘူး။
ကိုးကန့်တပ်နဲ့ စစ်တပ်အကြား အပစ်ရပ်ပြီးနောက် ဒေသခံတွေ နေရပ်သို့ ပြန်လာကြပြီး သင်္ကြန်ပွဲတော် ကျင်းပဖို့ကိုလည်း MNDAA က ပြင်ဆင်နေတယ်လို့ သိရပါတယ်။
စစ်ကောင်စီရဲ့ အရှေ့မြောက်တိုင်း စစ်ဌာနချုပ် (ရမခ)တည်ရှိရာ လားရှိုးမြို့ကို MNDAA က ပြီးခဲ့တဲ့ ၂ဝ၂၄ သြဂုတ် ၃ ရက်မှာ တိုက်ခိုက်သိမ်းပိုက်ထားပြီး အထူးဒေသ ၁ အဖြစ် ကြေညာကာ အုပ်ချုပ်နေပါတယ်။
