ပို့လဘား၊ မတ်လ ၂၁ ရက်၊ လားရှိုး
ကိုးကန့်တပ်မတော် MNDAA ထိန်းချုပ်ထားတဲ့ ရှမ်းမြောက် လားရှိုးမြို့မှာ မြန်မာ့ပြည်တွင်းရေးအပေါ် ဝင်ရောက်စွတ်ဖက်မှု လုပ်နေတဲ့ တရုတ်အစိုးရကို ဆန့်ကျင်ကြောင်း ပြောက်ကြားလှုပ်ရှားမှုသပိတ်တစ်ခု ပြုလုပ်ခဲ့တယ်လို့ သိရပါတယ်။
ပြောက်ကြားလှုပ်ရှားမှုသပိတ်ကို မနေ့ မတ်လ ၂၀ ရက် ည ၉ နာရီမှာ ပြုလုပ်ခဲ့ကြတာလို့ အမည်မဖော်လိုတဲ့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“လာမဲ့ ၂၂ ရက်နေ့ကျရင် တရုတ်နဲ့ MNDAA တို့ ဆွေးနွေးပွဲရှိတယ်လို့ ကြားရတယ်။ ကျနော်တို့ရဲ့ လှုပ်ရှားမှုက လာမဲ့အစည်းအဝေးမှာ တခုခုပြောင်းလဲမှု ရှိစေရေးပေါ့နော်။ ပြောင်းလဲမှုဆိုတာကလည်း ပြည်သူလူထုတွေကို ငဲ့ညှာတဲ့ ဆုံးဖြတ်ချက်မျိုးပေါ့။ အဲဟာကျနော်တို့ မျှော်လင့်တယ်ဗျ။ ပြီးတော့ တရုတ်ရဲ့ ဝင်ရောက်စွတ်ဖက်မှုတွေကို စကစကို တော်လှန်နေတဲ့ တိုင်းရင်းသားညီအစ်ကိုတွေအချင်းချင်း သွေးခွဲပေးနေတာမျိုး ကျနော်တို့ မလိုလားဘူး”
ဘုံရန်သူဖြစ်တဲ့ စစ်ကောင်စီတပ်ကို အားလုံးက တော်လှန်တိုက်ခိုက်နေချိန်မှာ ကိုယ့်နိုင်ငံရဲ့ အချုပ်အခြာအာဏာတွေကို တခြားတိုင်းတစ်ပါးက ဝင်ရောက်စွတ်ဖက်နေတာကို မလိုလားတာကြောင့် အခုလို လှုပ်ရှားမှုတွေ လုပ်ရခြင်းဖြစ်တယ်လို့ ဆိုပါတယ်။
လှုပ်ရှားမှုတွေကို လွတ်လပ်ရေးပန်းခြံ၊ လေယာဉ်ကွင်း၊ ၆၂၆ တပ် နံရံရှေ့၊ ထွေအုပ်ရုံးရှေ့၊ အထက-၈ ကျောင်း၊ ရပ်ကွက် ၅ ၊ ဘုရားပွဲတော်တွေမှာ “ကြားဝင်စွတ်ဖက်မှုများ ချက်ချင်းရပ်” ဆိုတဲ့ စာသားတွေနဲ့အတူ ပြုလုပ်ခဲ့ကြတာ ဖြစ်ပါတယ်။
လားရှိုးအပြင် တစ်နိုင်ငံလုံးမှာရှိတဲ့ ပြည်သူလူထုတွေကို ဒရုန်း၊ လေယာဉ်နဲ့ ဗုံးကြဲတိုက်ခိုက်နေတဲ့ စစ်ကောင်စီတပ်ကို တရုတ်က တိုက်ခိုက်ရေးပစ္စည်းတွေ ကူညီထောက်ပံ့ပေးနေတာကြောင့် တရုတ်ကို မလိုလားတာလို့ လှုပ်ရှားမှုမှာ ပါဝင်ခဲ့သူတွေက ပြောပါတယ်။
