ပို့လဘား၊ ဧပြီ ၅ ရက်၊ လားရှိုး
ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့ကို စစ်ကောင်စီထံ လွှဲပြောင်းပေးသွားမှာ ဖြစ်တဲ့အတွက် ပုံမှန်လည်ပတ်နေပြီဖြစ်တဲ့ ပြည်သူ့ဆေးရုံကြီးကို လာမယ့် ဧပြီ ၂၀ ရက်မှာ ပိတ်တော့မှာ ဖြစ်တယ်လို့ ဒေသခံတွေက ရွှေဖီမြေကို ပြောပါတယ်။
လားရှိုးမြို့ ပြည်သူ့ဆေးရုံက ပစ္စည်တွေကို ရွှေ့ပြောင်းနေပြီး ကျန်းမာရေးဝန်ထမ်းကလည်း လားရှိုးမြို့ကနေ စတင်ပြောင်းရွှေ့သွားကြပြီ ဖြစ်တယ်လို့ လားရှိုးဒေသခံအမျိုးသားတစ်ဦးက ပြောပါတယ်။
“ဆေးရုံတော့ ဘာမှမရှိတော့ဘူး။ ဝန်ထမ်းတွေလည်း အကုန်ရွှေ့ကုန်ပြီ။ ပစ္စည်းက သူတို့ မနေ့ကတည်းက ၁၂ ဘီးကားနဲ့ သယ်သွားနေကြတာ။ အခု လားရှိုးမှာ ပညာရေးဝန်ထမ်းနဲ့ အုပ်ချုပ်ရေးတွေပဲ ရှိတော့တာ။ ပညာရေးအပိုင်းလည်း သူတို့စာမေးပွဲ ဖြေပြီးရင် ရွှေ့ကြမယ်ထင်တာပဲ”
လားရှိုးမြို့ရှိ ကိုးကန့်တပ် လက်အောက်ခံ ကျန်းမာရေးဝန်ထမ်းတွေဟာ လားရှိုးကနေ သိန္နီ၊ ကွမ်းလုံ၊ ချင်းရွှေဟော်နဲ့ လောက်ကိုင်မြို့ဘက် ပြောင်းရွှေ့သွားမှာဖြစ်တယ်လို့ အဆိုပါ အမျိုးသားက ပြောဆိုပါတယ်။
လားရှိုးမြို့ကို ကိုးကန့်တပ် သိမ်းပိုက်လိုက်ပြီးနောက်ပိုင်း CDM ဝန်ထမ်းတွေနဲ့ ဆေးရုံကို ဖွင့်လှစ်ခဲ့ပြီး ပုံမှန်လည်ပတ်တဲ့ အခြေအနေ ရောက်ရှိလာတဲ့ ဆေးရုံလည်း ဖြစ်ပါတယ်။
လားရှိုးမှာရှိတဲ့ ဓာတ်အားခွဲရုံက ထရန်စမော်မာတွေကိုလည်း ကိုးကန့်တပ်က ဖြုတ်ယူသွားခဲ့တယ်လို့ နောက်ထပ်အမျိုးသားတစ်ဦးက ပြောပါတယ်။
“မနေ့က အဲဒီ EPC မှာလည်း စကား များကြတယ်။ အဲဒီ မီးကြိုး၊ ထရန်စဖော်မာတွေ မီတာဘောက်တွေ အကုန်ဖြုတ်ပြီး သယ်သွားကြတယ်။ သူတို့ လိုတဲ့ဟာတွေ အကုန်ဖြုတ်သွားတယ်။ မြို့ခံ ဝန်ထမ်းတွေက လားရှိုးမြို့အတွက်လည်း ထားပေးပါအုံးဆိုပြီး အချင်းချင်း စကားများကြတာပေါ့”
တရုတ်ရဲ့ ကြားဝင်ညှိနှိုင်းမှုအရ MNDAA ဟာ လားရှိုးမြို့ကို လာမယ့် ဧပြီ တတိယပတ်အတွင်း စစ်ကောင်စီထံ ပြန်လည် လွှဲပြောင်းပေးမှာဖြစ်တယ်လို့ ဒေသခံတွေက ပြောပါတယ်။
ပြီးခဲ့တဲ့ ဇန်နဝါရီ ၁၅ ရက်က စစ်တပ်နဲ့ MNDAA တို့ ကူမင်းမြို့မှာ တရုတ်ရဲ့ ကြားဝင်ညှိနှိုင်းမှုအရ တွေ့ဆုံဆွေးနွေးခဲ့ကြပြီး နှစ်ဖက် အပစ်ရပ် သဘောတူညီစာချုပ် တရားဝင် လက်မှတ် ရေးထိုးခဲ့ကြတာ ဖြစ်ပါတယ်။
မှတ်ချက်။ ။ဒီနေ့မနက်ပိုင်းက လားရှိုးမြို့ ရပ်ကွက်အုပ်ချုပ်ရေးမှူးတစ်ဦးက ဆေးရုံ ပိတ်လိုက်ပြီလို့ ပြောဆိုခဲ့တာပဲ ဖြစ်ပါတယ်။ ဒေသခံတွေရဲ့ ပြန်လည် ပြောဆိုလာတဲ့ အချက်အလက်အရ ဆေးရုံ ဖွင့်ထားဆဲ ဖြစ်ပြီး ဧပြီ ၂ဝ ရက်မှ စပိတ်မှာ ဖြစ်ပါတယ်။
