လွေးဇွန်မိုး၊ မတ်လ ၄ရက်၊ လားရှိုး
ကိုးကန့်တပ် MNDAA ထိန်းချုပ်ထားတဲ့ လားရှိုးမြို့က ကျင်းပမယ့် တပေါင်းပွဲမှာ လောင်းကစားဝိုင်းတွေပါ ဖွင့်ဖို့ ခွင့်ပြုထားတယ်လို့ ဒေသခံတွေစီက ရွှေဖီမြေက စုံစမ်းသိရပါတယ်။
တပေါင်းပွဲကို လာမယ့် မတ်လ ၇ ရက်ကနေ ၁၃ ရက်အထိ ၇ ရက်ကြာ မန်ဆူဘုရားမှာ ကျင်းပသွားမှာဖြစ်ပြီး ဆိုင်ခန်းတွေကို ဒီနေ့ မတ်လ ၄ ရက်မှာ နေရာချပေးသွားမှာဖြစ်ပြီး လောင်းကစားဝိုင်းတွေကိုတော့ ၅ ရက်နေ့မှာ နေရာပေးသွားမယ်လို့ မြို့ခံအမျိုးသမီးတစ်ဦးက ပြောပါတယ်။
“ပွဲက ၅ ရက်နေ့ နေရာပေးတော့မှာ။ ၄ ရက်နေ့ ဆိုင်ခန်းပေးမှာ။ ၅ ရက်နေ့ လောင်းကစားဝိုင်းတွေကို နေရာချပေးမယ်တဲ့။ ဆိုင်ခန်းကတော့ လူလာသလောက်ပေးမယ်ထင်တယ်။ ကန့်သတ်ထားတာတော့မရှိဘူး”
အဆိုပါပွဲမှာ ခြောက်ကောင်ဂျင်၊ ညိုညို၊ ရှမ်းကိုးမီး၊ ပေါက်စီ၊ ဖဲဝိုင်းအစုံပါမှာဖြစ်ပြီး လောင်းကစားဝိုင်းတစ်ဝိုင်းစာကို တစ်ရက် ငွေ ၁ သိန်းကျပ် ပေးဆောင်ရမယ်လို့ အထက်ပါ အမျိုးသမီးတွေက ဆက်ပြောပါတယ်။
“ဆိုင်ခန်းက အခုတော့ မဆောက်ထားသေးဘူး။ ဒါပေမယ့် အကွက်နေရာတော့ ရှင်းထားပြီးပြီ။ မန်ဆူဘုရားရဲ့ မျက်နှာချင်းဆိုင်ဘုရားဝန်းထဲမှာ နေရာချမှာ”
ပြီးခဲ့တဲ့ ဇန်နဝါရီ ၂၈ ရက်ကလည်း တရုတ်နှစ်သစ်ကူးပွဲဆိုပြီး လားရှိုးမြို့ရပ်ကွက် ၁၂ နဲ့ လွတ်လပ်ရေးပန်းခြံမှာ ဖွင့်ထားတဲ့ လောင်းကစားဝိုင်းတွေကို တစ်လအကြာ ဖေဖော်ဝါရီလကုန်မှ ပိတ်ခဲ့တာလို့ ဆိုပါတယ်။
အလားတူ တအာင်းတပ် TNLA ထိန်းချုပ်ထားတဲ့ ကွတ်ခိုင်မြို့ ရပ်ကွက် ၄ ပန်းခြံထဲမှာလည်း တရုတ်နှစ်သစ်ကူးပွဲ မတိုင်ခင် ပြီးခဲ့တဲ့ ဇန်နဝါရီ ၂၈ ရက်ကတည်းက လောင်းကစားဝိုင်းတွေ စဖွင့်ခဲ့ပြီး ဒီနေ့ မတ်လ ၃ ရက်အထိ ဆက်ဖွင့်နေဆဲဖြစ်တယ်လို့ ဆိုပါတယ်။
