ယာရူစိင်၊ ဧပြီ ၁၈ ရက်၊ ကျောက်မဲ
မန္တလေးဘက် စစ်ဘေးရှောင်တဲ့ ရှမ်းမြောက် ကျောက်မဲမြို့က စစ်ရှောင် ဒေသခံတွေဟာ ငလျင်ဘေး ထပ်ကြုံရလို့ အကူအညီ လိုအပ်နေပါတယ်။
လက်ရှိ စစ်ရှောင်နေတဲ့ဒေသမှာ အိမ်ထောင်စုစာရင်းအရသာ ကူညီပေးနေလို့ စစ်ရှောင်တွေဟာ နယ်ခံမဟုတ်လို့ အကူအညီ မရကြကြောင်း စစ်ရှောင်တွေကို ကူညီပေးနေတဲ့ စေတနာရှင်အဖွဲ့ဝင်တစ်ဦးက ရွှေဖီမြေကို ပြောပါတယ်။
“ပိုက်ဆံနဲ့ဆန် တခြားပစ္စည်း လှူတာတွေဆိုရင် ဒေသခံ အိမ်ထောင်စုအရ လှူတော့ စစ်ဘေးရှောင်တွေ အကူအညီ မရပါဘူး။ ထမင်းထုပ် ဝေတာတွေတော့ ရပါတယ်။ ကူညီသူ မရှိသလောက် ဖြစ်နေတယ်။ သူတို့တွေဟာ ငလျင်ဒဏ်နဲ့ စစ်ပွဲဒဏ် ခံစားနေရတာပါ။ အလုပ်အကိုင်တွေ ရပ်နားထားကြတော့ အလုပ်မရှိကြ အခက်အခဲမျိုးစုံနဲ့ ရင်ဆိုင်နေရတယ်”
အကူအညီ လိုအပ်နေတဲ့ ကျောက်မဲမြို့က စစ်ရှောင်တွေဟာ အိမ်ခြေ ၇၀ နီးပါးရှိတဲ့အပြင် တချို့ အဆက်အသွယ်မရတဲ့နေရာမှာ စာရင်း လာမပေးသေးတဲ့ ဒေသခံတွေ ရှိနေသေးတယ်လို့ ၎င်းက ဆက်ပြောပါတယ်။
ကျောက်မဲက စစ်ရှောင်တွေဟာ ပြည်ကြီးတံခွန်၊ ချမ်းမြသာစည်၊ စွယ်တော်ကားဝန်း၊ စက်မှု(၁) မြရည်နန္ဒာရပ်ကွက်၊ စိန်ပန်းရပ်ကွက်၊ ကျုံးအနောက်ဘက်၊ ထုံးဖိုရပ်၊ ၈၂ လမ်းဘုရားကြီးတိုက် ပေတောကျောင်းတိုက်၊ အောင်ပင်လယ် ကျောက်ဆည်မြို့၊ အောင်မြေသာစံအပြင် ရှမ်းတောင် အင်းလေးဒေသဘက်မှာ နေထိုင်ကြတာပါ။
