ရွှေဖီမြေ၊ ဧပြီ ၂၆ ရက်၊ လားရှိုး
ကိုးကန့်တပ်မတော်- MNDAA အနေနဲ့ ရှမ်းမြောက် လားရှိုးမြို့ကို ထိန်းချုပ်ထားစဉ် ကျန်းမာရေးကဏ္ဍကို အကောင်းဆုံးဖြစ်အောင် ကြိုးစားဆောင်ရွက်ခဲ့ပေမဲ့ နိုင်ငံရေး ဖိအားကြောင့် လားရှိုးကနေ ဆုတ်ခွာရတာဖြစ်တယ်လို့ ကိုးကန့်တပ်ရဲ့ ကျန်းမာရေးဌာနမှ တာဝန်ရှိသူတစ်ဦးက ပြောပါတယ်။
နိုင်ငံရေး ဖိအားကြောင့် လားရှိုးကနေ ဆုတ်ခွာရတဲ့အပေါ် များစွာ စိတ်မကောင်း ဖြစ်ခဲ့ရပြီး မြို့ကို ကိုးကန့်တပ် ထိန်းချုပ်စဉ် ၈ လကျော်ကြာ လူထုအတွက် ကျန်းမာရေးဝန်ဆောင်မှု အကောင်းဆုံးဖြစ်အောင် ကြိုးစားဆောင်ရွက်ခဲ့ကြောင်း ကျန်းမာရေးဌာနမှ တာဝန်ရှိသူတစ်ဦးရဲ့ ပြောကြားချက်ကို MNDAA က ဒီနေ့ ဧပြီ ၂၆ ရက်မှာ ထုတ်ပြန်လာပါတယ်။
လားရှိုးကို ထိန်းချုပ်ထားစဉ် ၈ လကျော်အတွင်း လူနာပေါင်း ၉ သောင်းကျော် (၉၅,၂၅၈ ဦး)ကို ကျန်းမာရေးဝန်ဆောင်မှု ပေးနိုင်ခဲ့တယ်လို့ ဖော်ပြထားပါတယ်။
“ပြည်သူတွေကို အကောင်းဆုံး လုပ်ပေးခဲ့တဲ့အပေါ် ကျေနပ်အားရပေမဲ့ နိုင်ငံရေးအရ အခုလို မဖြစ်မနေ ထားခဲ့ရတာကို စိတ်မကောင်း ဖြစ်မိပါတယ်” လို့ ကျန်းမာရေးဌာနရဲ့ တာဝန်ရှိသူတစ်ဦးက ပြောပါတယ်။
ဒါ့အပြင် လားရှိုးကနေ ကိုးကန့်တပ် ဆုတ်ခွာစဉ် လားရှိုးဆေးရုံရှိ ဆေးပစ္စည်းတချို့ ယူဆောင်သွားတာ ရှိပေမဲ့ လူထုတွေအတွက် အရေးကြီးတဲ့ ပစ္စည်းတွေသာ ယူဆောင်တာ ဖြစ်တယ်လို့ ကိုးကန့်တပ်က ဆိုပါတယ်။
တရုတ်ရဲ့ ကြားဝင်စေ့စပ်မှုကြောင့် စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ လားရှိုးမြို့ကနေ ပြီးခဲ့တဲ့ ဧပြီ ၂၁ ရက်က ထွက်ခွာခဲ့ရပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်မှာ ဖြစ်ပါတယ်။
နိုင်ငံရေးအကဲခတ်တွေကတော့ ကိုးကန့်တပ်ဟာ တရုတ်ရဲ့ ဖိအားကြောင့် လားရှိုးကနေ ပြန်ဆုတ်ခဲ့ရတာ ဖြစ်တယ်လို့ သုံးသပ်နေကြပါတယ်။
လားရှိုးကို စစ်ကောင်စီထံ ငြိမ်းချမ်းစွာ လွှဲပြောင်းပေးဖို့ တရုတ်နိုင်ငံရဲ့ အပစ်ရပ် စောင့်ကြည့်ရေးအဖွဲ့ကို လားရှိုးမြို့သို့ ပို့ဆောင်ထားပါတယ်။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို MNDAA နဲ့ နွေဦးတော်လှန်ရေးတပ်တွေက ပူးပေါင်းပြီး ပြီးခဲ့တဲ့ ၂၀၂၄ ခုနှစ် သြဂုတ် ၃ ရက်မှာ တိုက်ခိုက်သိမ်းပိုက်ပြီး ၈ လကျော်အကြာမှာ စစ်ကောင်စီထံ ပြန်လည် လွှဲပြောင်းပေးခဲ့ရတာ ဖြစ်ပါတယ်။
