မိုင်းရူပ၊ ဧပြီ ၁၇ ရက်၊ လားရှိုး
ရှမ်းမြောက် လားရှိုးမြို့ကနေ ထွက်ခွာတော့မယ်လို့ သတင်းတွေ ထွက်ပေါ်နေတဲ့ ကိုးကန့်တပ်မတော်- MNDAA ဟာ အုပ်ချုပ်ရေးအဖွဲ့တွေကို လာမယ့် ဧပြီ ၂၁ ရက်အထိသာ ရုံးတက်ဖို့ အသိပေးထားတယ်လို့ လားရှိုးပြန်လည်ထူထောင်ရေးမှာ ပါဝင်နေသူတချို့က ရွှေဖီမြေကို ပြောပါတယ်။
သင်္ကြန်ကာလအတွင်း လားရှိုးမြို့မှာ ရပ်ကွက်အုပ်ချုပ်ရေးရုံးတချို့ ပိတ်ထားပြီး ဌာနဆိုင်ရာရုံးမှာရှိတဲ့ ပစ္စည်းတွေကို ကိုးကန့်တပ်က ဆက်လက် သယ်ဆောင်သွားတယ်လို့ ဆိုပါတယ်။
“၂၁ ရက်နေ့အထိ အလုပ် လုပ်သွားဖို့ လူကြီးက မှာထားပါတယ်။ ကိုးကန့်တပ်တော့ ပစ္စည်းအကုန်သယ်နေကြတာပဲ” လို့ ပါဝင်နေသူတစ်ဦးက ရွှေဖီမြေကို ပြောပါတယ်။
လားရှိုး ပြန်လည်ထူထောင်ရေးမှာ ပါဝင်နေတဲ့ CDM ဝန်ထမ်းနဲ့ နိုင်ငံရေးအကျဥ်းသားတချို့ကတော့ မြို့တွင်းကနေ ထွက်ခွာကြပြီး မြို့လုံခြုံရေး လုပ်နေတဲ့ ကိုးကန့်တပ်ဖွဲ့ဝင်တချို့ကတော့ ဆက်ရှိနေတယ်လို့ သိရပါတယ်။
ဒါပေမဲ့ မနက်ဖြန် ဧပြီ ၁၈ ရက်မှာတော့ စစ်ကောင်စီရဲ့ အုပ်ချုပ်ရေးအဖွဲ့တွေ ဝင်ရောက်လာမှာဖြစ်ပြီး ရောက်ရှိလာမယ့် အရေအတွက်ကိုတော့ မသိရသေးပါဘူး။
တရုတ်ရဲ့ ကြားဝင်စေ့စပ်မှုနဲ့ စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက် ကိုးကန့်တပ်ဟာ ဧပြီ ၂၁ ရက်နောက်ဆုံးထားကာ လားရှိုးမြို့ကနေ ထွက်ခွာရမှာဖြစ်ပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက် လည်ပတ်မှာဖြစ်ကြောင်း သတင်းထွက်နေပါတယ်။
လားရှိုးအရေးနဲ့ ပတ်သက်ပြီး စစ်ကောင်စီနဲ့ ကိုးကန့်တပ်ဘက်က တရားဝင် ထုတ်ပြောတာ မရှိသေးပါဘူး။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို MNDAA နဲ့ နွေဦးတော်လှန်ရေးတပ်တွေက ပူးပေါင်းပြီး ပြီးခဲ့တဲ့ ၂၀၂၄ ခုနှစ် ဩဂုတ် ၃ ရက်မှာ တိုက်ခိုက်သိမ်းပိုက်ခဲ့တာပဲ ဖြစ်ပါတယ်။
