မိုင်းရူပ၊ ဇန်နဝါရီ ၁၅ ရက်၊ လားရှိုး
ကိုးကန့်တပ်မတော်- MNDAA ထိန်းချုပ်ထားတဲ့ ရှမ်းမြောက် လားရှိုးမြို့မှာ ပြန်ပေးဆွဲမှု ဖြစ်ပွားခဲ့ပြီး ပြန်ပေးဆွဲသူ ၃ ဦးကို ကိုးကန့်တပ်က ပစ်ခတ်ဖမ်းဆီးခဲ့တယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဇန်နဝါရီ ၁၃ ရက်မှာ လားရှိုးမြို့ ရပ်ကွက် ၁ နယ်မြေ ၉ မှာ အမျိုးသားတစ်ဦး ပြန်ပေးဆွဲခံရတဲ့ဖြစ်စဉ် ဖြစ်ပွားခဲ့ပါတယ်။
မနေ့ ဇန်နဝါရီ ၁၄ ရက် ည ၇ နာရီဝန်းကျင်မှာတော့ ပြန်ပေးဆွဲခံရတဲ့ အမျိုးသားကို ငွေနဲ့ ပြန်ရွေးခိုင်းချိန် ပြန်ပေးဆွဲသူ ၃ ဦးကို ကိုးကန့်တပ်ဘက်က လိုက်လံ ဖမ်းဆီးခဲ့ရာ လားရှိုးမြို့ပြင်မှာ ပစ်ခတ်ဖမ်းဆီးနိုင်ခဲ့တယ်လို့ ဖြစ်စဉ်ကို သိရှိထားတဲ့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
“ပြန်ပေးဆွဲသွားပြီး မနေ့ လာရွေးခိုင်းပါတယ်။ ငွေ ဘယ်လောက်လဲတော့ မသိဘူး။ ကိုးကန့်တပ်တွေ စောင့်ဖမ်းချိန် ကားနဲ့ ပြေးတော့ နောက်ကနေ လိုက်တာ။ မြို့နေလူထု လန့်မှာ စိုးရိမ်တာရယ်။ မဆိုင်သူ ထိမှာစိုးလို့ မြို့ပြင်ရောက်မှ ပစ်ခတ်ဖမ်းဆီးလိုက်တာ”
ကိုးကန့်တပ်ဘက်က ပစ်ခတ်ဖမ်းဆီးခဲ့တဲ့ ပြန်ပေးဆွဲသူ အမျိုးသား ၃ ဦးဟာ သေဆုံးတာမရှိဘဲ လားရှိုး ဆေးရုံမှာ ပို့ဆောင်ထားတယ်လို့ လားရှိုးဒေသခံတစ်ဦးက ပြောပါတယ်။
ဒါ့အပြင် ပြန်ပေးဆွဲခံရတဲ့ အမျိုးသားလည်း လွတ်မြောက်လာပြီလို့ သူက ဆက်ပြောပါတယ်။
လားရှိုးမြို့ကို MNDAA က ထိန်းချုပ်ပြီးနောက် ဒီပြန်ပေးဆွဲမှုဟာ ပထမဆုံးအကြိမ် ဖြစ်ပွားခဲ့တာပါ။
လားရှိုးမြို့ကို ပြီးခဲ့တဲ့ ဩဂုတ် ၃ ရက်မှာ MNDAA နဲ့ ပူးပေါင်းတပ်တွေက တိုက်ခိုက်သိမ်းပိုက်နိုင်ခဲ့ပြီး ၎င်းတို့ရဲ့ အုပ်ချုပ်ရေးယန္တရား လည်ပတ်နေတဲ့မြို့လည်း ဖြစ်ပါတယ်။
