မြတ်နိုး၊ မေ ၁၀၊ ဗန်းမော်
ကချင်ပြည်နယ်၊ ဗန်းမော်မြို့သိမ်းတိုက်ပွဲမှာ ဒီရက်ပိုင်းအတွင်း စစ်ကောင်စီ လေကြောင်းနဲ့ လာချပေးတဲ့ လက်နက်ခဲယမ်း အချို့ကို KIA ပူးပေါင်းတပ်ဖွဲ့ ဘက်က သိမ်းဆည်းရမိကြောင်း ရှေ့တန်း သတင်း ရင်းမြစ်တွေဆီက သိရပါတယ်။
“စစ်ကောင်စီတွေဆီက ကောက်ရတာ။ လေယာဉ်နဲ့ လာချပေးတဲ့ 60 MM သီးတွေ အများဆုံးကောက်ရတယ်” လို့ ရှေ့တန်း သတင်းအရင်းမြစ် တစ်ဦးက ရွှေဖီမြေကို ပြောပါတယ်။
စစ်ကောင်စီဘက်က လေကြောင်းနဲ့ ၁ရက်ကို ၆ကြိမ်ထက်မနည်း လက်နက်ပစ္စည်းတွေကို လေကြောင်းကနေ လာရောက်ချပေးနေတယ်လို့ ဆိုပါတယ်။
“စစ်ကောင်စီတွေက ကျုံးထဲမှာ ပိုက်တွေနဲ့ လျှပ်စစ်လှိုင်း ဓာတ်လိုက်အောင် လွှတ်ထားတော့ ဟိုတလောက ဘယ်လိုမှ ရှေ့မတိုးနိုင်ဘူး။ အခုက အဲဒါ ထုတ်လိုက်လို့ တိုက်ရတာ နည်းနည်းလွယ်သွား တယ်။ အဲဒါကြောင့် ဒီရက်ပိုင်း တိုက်ပွဲက ထိရောက်တယ်ပြောတယ်”လို့ ရှေ့တန်းနဲ့ နီးစပ် သူ တစ်ဦးက ပြောပါတယ်။
လက်ရှိမှာတော့ စကခ – ၂၁တပ်ထဲမှာ ထိပ်တိုက် ဝင်တိုက်နေပြီဖြစ်ပြီး မြို့ထဲမှာတော့ အရပ်သားအများအပြားလည်း ကျန်ရှိနေတယ်လို့ ဆိုပါတယ်။
“ဗန်းမော် မြို့ထဲကနေ တိုက်ပွဲ စဖြစ်တဲ့ ၂၀၂၄ ဒီဇင်ဘာ ၄ ရက်နေ့ မနက်ပိုင်းမှာ ရှောင်တဲ့ ဒေသခံတွေက လွတ်တယ်။ နောက်ကျမှ ရှောင်တဲ့ လူတွေက ထွက်လို့ မရတော့ဘူး။ အဲဒါကြောင့် မြို့ထဲ အရပ်သားတွေ အများကြီး ကျန်နေတာ” လို့ ဒေသခံ တစ်ယောက်က ပြောပါတယ်။
ဗန်းမော်မြို့မှာ စစ်ကောင်စီတွေရဲ့ တပ်စခန်းတွေ ရာချီရှိနေတာဖြစ်ပြီး အဲဒီထဲက ခန့်မှန်းခြေ ၈၀ ရာခိုင်နှုန်းလောက် ရထားပြီလို့ ပြောနိုင်ပြီး တိုက်ပွဲ အတွင်း နှစ်ဖက် အကျအဆုံးများနေတယ်လို့ ဆိုပါတယ်။
ဗန်းမော်မြို့ရှိ စစ်ကောင်စီ တပ်စခန်းတွေကို ပြီးခဲ့တဲ့ ၂၀၂၄ ဒီဇင်ဘာလ ၄ ရက်နေ့ကစ KIA နဲ့ ပူးပေါင်း တပ်ဖွဲ့တွေက စတင် ထိုးစစ်ဆင် တိုက်ခိုက် နေတာ ဖြစ်ပါတယ်။
