မိုင်းရူပ၊ နိုဝင်ဘာ ၁၄ ရက်၊ လားရှိုး
လားရှိုး–သီပေါ ပြည်ထောင်စုလမ်းမကြီးကနေ လာမယ့် နိုဝင်ဘာ ၂၀ ရက် နောက်ဆုံးထားပြီး တပ်ဆုတ်ပေးဖို့ စစ်ကောင်စီက ဖိအားပေးနေတယ်လို့ စစ်ရေးသတင်းအရင်းအမြစ်တချို့က ရွှေဖီမြေကို ပြောပါတယ်။
ပြီးခဲ့တဲ့ နိုဝင်ဘာ ၁၁ ရက်က လားရှိုးမြို့ ဆင်နှစ်ကောင် ဟိုတယ်မှာ ကိုးကန့်တပ်နဲ့ စစ်ကောင်စီတပ် ကိုယ်စားလှယ်တွေ ထပ်တွေ့ခဲ့ပြီး စစ်ကောင်စီဘက်က ကိုးကန့်ဘက်အနေနဲ့ လားရှိုး–သီပေါ ပြည်ထောင်စုလမ်းမကြီးကနေ ဆုတ်ပေးဖို့ ပြောဆိုခဲ့ပြီး ကိုးကန့်တပ်က လက်မခံဘူးလို့ ဆိုပါတယ်။
“လားရှိုး–သီပေါလမ်း တစ်လျှောက်လုံး ၂၀ ရက်နေ့ ပြန်ဆုတ်ခိုင်းတာ။ ကိုးကန့်က လက်မခံဘူး။ သူတို့နယ်မြေဘယ်နေရာမှ မပေးနိုင်ဘူးတဲ့။ စကစက တရုတ်အားကိုးနဲ့ လုပ်နေတာ”
လက်ရှိမှာ လားရှိုးမြို့ပြင် ဟိုယရွာမှာ စစ်ကောင်စီနဲ့ MNDAA တို့ အကြား စစ်ရေးတင်းမာနေပြီး သီပေါတံတားမှာ စစ်ကောင်စီနဲ့ MNDAA တို့ ဖြတ်သန်းသွားလာခွင့်ကို အပြန်အလှန် ပိတ်ထားကြပြီး ခရီးသွားတချို့ လမ်းမှာ ပိတ်မိနေတဲ့ အခက်အခဲတွေ ဖြစ်ပေါ်နေပါတယ်။
စစ်ကောင်စီဟာ မန္တလေး–သီပေါ ပြည်ထောင်စုလမ်းမကြီးကို ထိန်းချုပ်ထားပေမယ့် သီပေါ–လားရှိုး ပြည်ထောင်စုလမ်းမကြီးကိုတော့ ကိုးကန့်တပ်ဘက်က ထိန်းချုပ်ထားတာ ဖြစ်ပြီး စစ်ကောင်စီက လားရှိုး–သီပေါ လမ်းမကြီးတစ်ခုလုံး ပြန်ထိန်းချုပ်လိုတဲ့ အခြေအနေဖြစ်ပါတယ်။
တရုတ်နိုင်ငံရဲ့ ကြားဝင်စေ့စပ်မှုကြောင့် ကိုးကန့်တပ်မတော်–MNDAA ထိန်းချုပ်ထားတဲ့ လားရှိုးမြို့ပေါ်က နေရာတွေကို ပြီးခဲ့တဲ့ ဧပြီလထဲမှာ စစ်ကောင်စီထံ ပြန်လည် လွှဲပြောင်းပေးခဲ့ရတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
