မိုင်းဖိူမ်းဆငဲ၊ အောက်တိုဘာ ၇ ရက်၊ ကျောက်မဲ
တအာင်းတပ် – PSLF/TNLA ထိန်းချုပ်နယ်မြေဖြစ်တဲ့ ကျောက်မဲမြို့နယ် မိုင်းလုံမြို့အနီးရှိ မယ်ဟုန်ကျေးရွာထဲကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်မှု ပြုလုပ်ခဲ့တာကြောင့် ကလေးငယ်အပါအဝင် ဒေသခံ ၁၀ ဦး ပွဲချင်းပြီး သေဆုံးသွားခဲ့တယ်လို့ ရွှေဖီမြေက စုံစမ်းသိရပါတယ်။
ဒီနေ့ အောက်တိုဘာ ၇ ရက် နေ့လည် ၁၂ ခွဲခန့်မှာ စစ်ကောင်စီတပ်က ဂျက်ဖိုက်တာနဲ့ ကျေးရွာထဲကို ပေါင် ၂၅၀ ဗုံးနှစ်လုံး ကြဲချတိုက်ခိုက်ခဲ့တာဖြစ်ပါတယ်။
မြေပြင် သတင်းရင်းမြစ်တစ်ဦးက “နေ့လည် ၁၂ နာရီလောက်က လေကြောင်းကနေတိုက်ခိုက်တာ။ ပြည်သူ ၁၀ ယောက်သေ၊ ၃ ယောက် ဒဏ်ရာရတယ်”လို့ ပြောပါတယ်။
သေဆုံးသွားတဲ့ အထဲမှာ မိုင်းအိုက်ဦးခေါ် အသက် ၂ နှစ်အရွယ် ကလေးတစ်ယောက်လည်း ပါဝင်သလို ဒဏ်ရာရရှိသူတွေထဲ ကလေး ၂ ယောက်ပါသလို နေအိမ် ၆ လုံးလည်း ထိမှန်ပျက်စီးခဲ့ပါတယ်။
ဒီနေ့ အောက်တိုဘာ ၇ ရက် မနက်ပိုင်း ၇ နာရီမထိုးခင်မှာလည်း စစ်ကောင်စီတပ်က နမ္မတူမြို့က ပုဗ္ဗာရုံဘုန်းကြီးကျောင်းကို ဗုံးကြဲတိုက်ခိုက်မှု ပြုလုပ်ခဲ့ပါတယ်။
စစ်ကောင်စီတပ်ဟာ တစ်ပတ်အတွင်း နမ္မတူ၊ နမ့်ဆန်၊ သီပေါ၊ ကျောက်မဲ စတဲ့ မြို့နယ်တွေမှာ ဗုံးကြဲတိုက်ခိုက်မှု ဆက်တိုက်ပြုလုပ်ခဲ့တာကြောင့် ၂၀ ဦးထက်မနည်း သေဆုံးခဲ့ပြီ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
