မိုင်းရူပ၊ သြဂုတ် ၁၉ ရက်၊ ကျောက်မဲ
စစ်တပ် ပြန်ထိန်းချုပ်ထားတဲ့ နောင်ချိုမြို့နယ် ဂုတ်ထိပ်ဘက်ကနေ ကျောက်မဲမြို့နယ် နောင်ပိန်ဘက် လက်နက်ကြီးနဲ့ အတွဲလိုက်ဒုံးတွေ ဆက်တိုက် ပစ်ခတ်နေပြီး စစ်တပ်ဘက်က မြေပြင်ထိုးစစ်ဆင်တာ မရှိသေးဘူးလို့ မြေပြင်မှာ ရှိနေသူတွေက ရွှေဖီမြေကို ပြောပါတယ်။
“မြေပြင်ထိုးစစ်က မရှိဘူး။ သတင်းအမှားတွေ တက်နေတာ။ လက်နက်ကြီးနဲ့ အတွဲလိုက်ဒုံးတွေ ပစ်နေတာတော့ ဒီနေ့က ခဏခဏပဲ။ နောင်ပိန်ဘက်ကို ပစ်နေတာ” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
စစ်တပ်ဘက်က အထက်ရဲရွာ ရေအားလျှပ်စစ် စီမံကိန်းကနေ နောင်ပိန်ရွာဘက် ဦးတည်တဲ့စစ်ကြောင်း ထိုးလာတယ်ဆိုတဲ့သတင်း ထွက်ပေါ်နေတာပဲ ဖြစ်ပါတယ်။
တစ်ဖက်မှာလည်း စစ်တပ်က ရှမ်းတောင် ရပ်စောက်မြို့နယ်ကနေ ရှမ်းမြောက်ဘက် စစ်အင်အား ဖြည့်တင်းနေပြီး ကျောက်မဲမြို့နယ်ဘက် ထိုးစစ် ဆင်လာနိုင်တယ်လို့ သုံးသပ်မှုတွေ ရှိနေပါတယ်။
နောင်ပိန်ရွာမှာတော့ စစ်တပ်ရဲ့ လက်နက်ကြီးနဲ့ ဒရုန်း တိုက်ခိုက်မှုတွေကြောင့် ဒေသခံအများစုဟာ ဘေးလွတ်ရာ ထွက်ပြေးတိမ်းရှောင်နေရတယ်လို့ သိရပါတယ်။
မနေ့ ဩဂုတ် ၁၈ ရက် နေ့လယ်ပိုင်းကစပြီး နောင်ချိုမြို့ကနေ နောင်ပိန်အနီးရှိ လုံကြိမ်နဲ့ ကျောင်းကုန်းရွာတွေကို စစ်တပ်က လက်နက်ကြီး ပစ်ခတ်တိုက်ခိုက်ခဲ့တာကြောင့် အမျိုးသားတစ်ဦး သေဆုံးပြီး ကိုရင်တစ်ပါး ထိမှန်ဒဏ်ရာ ရခဲ့ပါတယ်။
စစ်တပ်ဟာ နောင်ချိုမြို့ကို ပြန်ထိန်းချုပ်ပြီးနောက် ကျောက်မဲနဲ့ မိုးကုတ်ဘက် ဦးတည်တဲ့ စစ်ရေး ပြင်ဆင်မှု ပြုလုပ်လာပြီး နောင်ချို-မိုးကုတ်လမ်းပိုင်းပေါ်ရှိ ကျေးရွာတချို့ကို TNLA ဘက်က လက်လွှတ်ရတာတွေ ရှိခဲ့ပါတယ်။
လက်ရှိ စစ်ရေး အခြေအနေတွေနဲ့ ပတ်သက်ပြီး အသေးစိတ်သိရဖို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးကို ရွှေဖီမြေက ဆက်သွယ်မေးမြန်းထားဆဲ ဖြစ်ပါတယ်။
မနက်ဖြန် သြဂုတ် ၂၀ ရက်မှာ တရုတ်နိုင်ငံရဲ့ ကြားဝင်စေ့စပ်မှုကြောင့် စစ်တပ် ကိုယ်စားလှယ်နဲ့ PSLF/TNLA တို့ အကြား တရုတ်နိုင်ငံ ကူမင်းမြို့မှာ တွေ့ဆုံမယ်လို့ သတင်း ထွက်ပေါ်နေပေမဲ့ ရွှေဖီမြေက သီးခြားအတည်ပြုနိုင်တာ မရှိသေးပါဘူး။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
