မြတ်နိုး၊ မေလ ၂၇ ရက်၊ ဗန်းမော်
ဗန်းမော်မြို့ထဲက စစ်ကောင်စီတပ်ဖွဲ့ရဲ့ စနိုက်ပါသမားတွေ အခြေချထားတဲ့ နေရာတစ်ခုကို ဒီနေ့ မေလ ၂၇ ရက် မနက်ပိုင်းက KIA နဲ့ တော်လှန်ရေး ပူးပေါင်းတပ်ဖွဲ့တွေ တိုက်ခိုက်ရှင်းလင်းခဲ့ကြောင်း ရှေ့တန်းနဲ့ နီးစပ်သူတွေဆီက သိရပါတယ်။
“အဲဒီ အဆောက်အဦးပေါ်ကနေပဲ ပတ်ပတ်လည် စနိုက်ပါ ချိန်ထားလို့ ကျနော်တို့ဘက်က လှုပ်ရှားရခက်တာ။ တစ်ယောက်လာရင် တစ်ယောက်ပစ်တယ်။ အဲဒါကြောင့် စကခ ၂၁ တိုက်ဖို့ အတော်ခက်ခဲနေတာ ဒီမနက်တော့ အကုန်ရှင်းလိုက်ပြီ” လို့ ရှေ့တန်းနဲ့ နီးစပ်သူတစ်ဦးက ပြောပါတယ်။
ဒီနေ့ မေလ ၂၇ ရက် မနက် ၄ နာရီခန့်ကစ ဗန်းမော် စကစတပ်ကိုလည်း တော်လှန်ရေးတပ်တွေက တစ်ကျော့ပြန် ထိုးစစ်ဆင်နေပြီလို့ သူက ပြောပါတယ်။
“ဒီတစ်နှစ်လုံး ကျနော်တို့ကို အနှောင့်အယှက် ပေးနေတဲ့ အမြင့်ဆုံးနေရာ ဟုတ်တယ်။ အဲဒီပေါ်ကနေ စစ်ကောင်စီတွေက စနိုင်ပါတွေ၊ ဒရုန်းတွေ၊ နည်းပညာနဲ့ ဆိုင်တာတွေ အဲဒီ အဆောက်အဦးပေါ်မှာထားပြီး ကျနော်တို့ကို ချနေတာ”
ဒီနေ့မနက်အစောပိုင်း မိုးမလင်းခင်ကတည်းက ဗန်းမော်မှာ တိုက်ပွဲ ပြန်လည် ပြင်းထန်နေပြီး စစ်ကောင်စီရဲ့ ဗုံးကြဲလေယာဉ်တွေ မြစ်ကြီးနားအပြင် တံတားဦးဘက်ကနေ တက်လာပြီး စစ်ကူပေးနေတယ်လို့ သူက ပြောပါတယ်။
ပြီးခဲ့တဲ့ မေလ ၂၀ ရက်က KIA နဲ့ ပူးပေါင်းတပ်ဖွဲ့တွေ စစ်ကောင်စီရဲ့ ရဟတ်ယာဉ်ကို ပစ်ချခဲ့ပြီးနောက် ဗန်းမော်မှာ တိုက်ပွဲ အနည်းငယ် ငြိမ်နေရာက အခုလို တစ်ကျော့ပြန် တိုက်ပွဲ ပြန်လည် ပြင်းထန်လာတာပဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
