ယာရူစိင်း၊ ဇန်နဝါရီ ၈ ရက်၊ မူဆယ်
ရှမ်းမြောက် မူဆယ်မြို့မှာ လျှပ်စစ်မီးကို အချိန် သတ်မှတ်ချက် တိတိကျကျ မရှိဘဲ ပေးချင်တဲ့အချိန်သာ ပေးတာကြောင့် လူထုတွေ အခက်တွေ့နေရတဲ့အပြင် ဒီဇယ် တစ်လီတာကို ၁ သောင်းခွဲအထိ စျေးမြှင့်တက်လာပါတယ်။
မီးကို ပေးချင်တဲ့အချိန်သာ ပေးနေပြီး မီတာခကတော့ တစ်နေ့ထက်တစ်နေ့ ပိုတက်လာပြီး လျှော့ကျတာမျိုး မရှိဘူးလို့ မူဆယ်မြို့ခံ အမျိုးသမီးတစ်ဦးက ရွှေဖီမြေကို ပြောပါတယ်။
“အရမ်းစိတ်ညစ်ရတယ်။ တော်တော် အခက်အခဲ များပါတယ်။ မီး ပုံမှန်မရတော့ မီးသွေးနဲ့ဘဲ ပိုပြီးအသုံးပြုလာတာပေါ့။ မီးကျတော့ ပုံမှန်မပေးဘူး မီတာခတော့ ပြောမနေနဲ့ တစ်နေ့တစ်နေ့ တက်လာတယ်။ အခုက ထမင်းတစ်အိုးချက်ဖို့ မလွယ်ဘူး”
မီးသွေးတစ်အိတ် ၃ သောင်းကျော်အထိ ဈေးပေါက်နေသလို ဒီဇယ် တစ်လီတာလည်း ၁ သောင်းခွဲအထိ မြှင့်တက်နေတယ်လို့လည်း နောက်ထပ် ဒေသခံ အမျိုးသားတစ်ဦးက ပြောပါတယ်။
“မီးသွေးဈေးလဲ တက် ဒီဇယ်ဈေးလည်း တက် ပြီးရင် ဈေးမတက်သင့်တဲ့ ပစ္စည်းတွေလည်း ဈေးတက်တော့မှာလေ။ အခု ဘာမှ မဝယ်နိုင်တော့ဘူး။ စက်နှိုးမယ်ဆိုလည်း ဒီဇယ်ဈေး တက်နေတာတွေကို ကြည့်လေ မဖြစ်သင့်ဘူးပေါ့နော်။ ကြာလာရင် ထမင်းပါ ငတ်တော့မယ် ထင်ပါတယ်။ တစ်ေခါက်ကို ၄ နာရီ ၆ နာရီလောက်ဘဲ ပေးတာ။ အဲလောက်ဘဲ ကျန်တဲ့အချိန်တော့ မလာဘူး”
လျှပ်စစ်မီးကို အချိန် တိတိကျကျ မပေးတာကြောင့် ချက်ပြုတ်ရေးအပါအဝင် လျှပ်စစ်မီးကို အားထားပြီး လုပ်နေရတဲ့ လုပ်ငန်းတွေလည်း အခက်အခဲ ကြုံတွေ့နေရပါတယ်။
ပြီးခဲ့တဲ့ ဇန်နဝါရီ ၆ ရက်မှာ စစ်ကောင်စီရဲ့ လျှပ်စစ်စွမ်းအင်ဝန်ကြီးဌာနကတော့ တစ်နိုင်ငံလုံးအတိုင်းအတာနဲ့ လျှပ်စစ်ဓာတ်အား တစ်ရက်ကို (၂,၂၀၀)မဂ္ဂါဝပ်ခန့်သာ ထုတ်လုပ်နိုင်ပြီး ထုတ်လုပ်မှုရဲ့ ၅၀ ရာခိုင်နှုန်းခန့်ကိုသာ ဖြန့်ဖြူးပေးနိုင်တာလို့ ထုတ်ပြန်ထားပါတယ်။
