မြတ်နိုး၊ ဖေဖော်ဝါရီ ၂၁ ရက်၊ ဗန်းမော်
ကချင်ပြည်နယ် ဗန်းမော် တိုက်ပွဲမှာ မနေ့ ဖေဖော်ဝါရီ ၂၀ ရက်က စစ်ကောင်စီတပ်ရဲ့ လက်နက်ခဲယမ်းတချို့နဲ့ သုံ့ပန်းတချို့ကို ဖမ်းဆီးရမိထားကြောင်း ရှေ့တန်းနဲ့ နီးစပ် သူတွေဆီက သိရပါတယ်။
“ဗန်းမော်မှာ စစ်ကောင်စီ အရှင်တွေရော အများကြီး ဖမ်းဆီးရထားတယ်။ စစ်ကောင်စီ အလောင်းတွေလည်း အတော် ပြန့်ကျဲနေတာလို့ သိထားရတယ်” ဆိုပြီး ရှေ့တန်းနဲ့ နီးစပ်သူတစ်ဦးက ပြောပါတယ်။
စစ်တပ်က လေကြောင်းနဲ့ လာချတဲ့ ဒရုန်းအသစ်တွေကိုလည်း KIA နဲ့ ပူးပေါင်းတပ်ဖွဲ့ဘက်က ရရှိထားသလို စကခ ၂၁ ဘက်က ပျံတက်လာတဲ့ ဒရုန်း တစ်စီးပြီးတစ်စီး ပစ်ခတ်ခဲ့ရာ မနေ့မနက် ဒရုန်းတစ်စီး ပြန်ပစ်ချနိုင်ခဲ့ကာ ဂျမ်မာတစ်ခုကိုလည်း ပစ်ခတ်ဖျက်ဆီးနိုင်ခဲ့တယ်လို့ သူက ပြောပါတယ်။
“ခလရ ၂၃၆ က လက်နက်ခဲယမ်းတချို့သိမ်းပိုက်ရရှိတယ်။ ခလရ ၂၃၆ ကနေဆုတ်ခွာလာတဲ့ စစ်ကောင်စီတပ်ဖွဲ့တွေကို စကခ ၂၁ အစပ်မှာ ပိတ်ဆို့တိုက်ခိုက်တာမှာ စစ်ကောင်စီ ၇၀ လောက် လက်နက် ချကြတယ်” လို့ ရှေ့တန်း သတင်းရင်းမြစ်တစ်ဦးကလည်း ပြောပါတယ်။
ခလရ ၂၃၆ နဲ့ စကခ ၂၁ ကြားက လိပ်ပြာကုန်းဆိုတဲ့ ကာကင်းစခန်းကို ရှင်းလင်းရာမှာ ဆုတ်ခွာလာတဲ့ စစ်ကောင်စီ စကခ ၂၁ ထဲ မရောက်ခင် ပိတ်ဆို့မှုကြောင့် လက်နက် ချခဲ့တာဖြစ်ပြီး သုံ့ပန်းတွေထဲ အရာရှိတစ်ဦး ပါဝင်တယ်လို့ ဆိုပါတယ်။
ဗန်းမော် တိုက်ပွဲမှာ စစ်တပ်ဘက်ကလည်း ဒရုန်းနဲ့ လေကြောင်း အဓိက အသုံးပြုခုခံရာ နိုင်ငံတကာက အသုံးပြုမှု ပိတ်ပင်ထားတဲ့ Cluster bomb နဲ့ Thermobaric bomb ကိုပါ အသုံးပြုလာတာ တွေ့ရတယ်လို့ KIA နဲ့ ပူးပေါင်းတော်လှန်ရေးတပ်ဖွဲ့နဲ့ နီးစပ်သူတွေက ပြောပေမဲ့ ရွှေဖီမြေက အတည်မပြုနိုင်ပါဘူး။
ဗန်းမော်မြို့က စစ်တပ်စခန်းတွေကို KIA နဲ့ ပူးပေါင်းတော်လှန်ရေးတပ်ဖွဲ့တွေက ပြီးခဲ့တဲ့ ၂၀၂၄ ခုနှစ် ဒီဇင်ဘာ ၄ ရက်က စတင်ထိုးစစ်ဆင် တိုက်ခိုက်ခဲ့တာ ဖြစ်ပါတယ်။
