မိုင်းရူပ၊ ဖေဖော်ဝါရီ ၁၄ ရက်၊ နောင်ချို
တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် နောင်ချိုမြို့နဲ့ မိုင် ၂၀ ခန့် ကွာဝေးတဲ့ တောင်းခမ်းရွာမှာ စစ်ကောင်စီတပ်နဲ့ TNLA တို့အကြား ၆ လကျော်တဲ့အထိ တိုက်ပွဲ ဆက်ဖြစ်နေတယ်လို့ ရွှေဖီမြေက စုံစမ်းသိရှိရပါတယ်။
“တိုက်ပွဲကတော့ နေ့တိုင်းလိုလိုဖြစ်တာ။ ဖြစ်လိုက် နားလိုက်ပေါ့။ စစ်ကောင်စီက ဒရုန်းနဲ့ လက်နက်ကြီးတွေ ပိုသုံးလာတယ်။ TNLA ဘက်က လက်နက်အချို့ သိမ်းဆည်းရမိတာ ရှိတယ်” လို့ ရှေ့တန်း သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
လက်ရှိမှာ တောင်းခမ်းရှိ တပ်စခန်းအားလုံးကို စစ်တပ်က ပြန်လည် ထိန်းချုပ်ထားပြီး TNLA က စစ်တပ်စခန်းတွေကို ဝိုင်းရံပိတ်ဆို့ထားတဲ့ အခြေအနေလို့ ဆိုပါတယ်။
တောင်းခမ်းရွာမှာ စစ်ကောင်စီရဲ့ အမြှောက်တပ်စခန်း ကွပ်ကဲမှုဌာနချုပ် ၉၀၂၊ အမြှောက်တပ် ၃၅၄၊ ၂၀၆ နဲ့ ၄၀၆ တပ်တွေ အခြေချ တပ်စွဲထားပါတယ်။
ရှမ်းတောင် ရပ်စောက်မြို့နယ်ကနေ တောင်းခမ်းဘက် စစ်တပ်က စစ်ကူ ပို့ပေးနေတဲ့ လမ်းကြောင်း ရှိနေတာကြောင့် တောင်းခမ်းကို စစ်ကောင်စီတပ်က ဆက်လက် ထိန်းထားနိုင်တာလို့ မြေပြင်အခြေအနေ သိရှိသူတွေက ရွှေဖီမြေကို ပြောဆိုထားပါတယ်။
တောင်းခမ်းရွာမှာ ၂၀၂၄ ခုနှစ် သြဂုတ်လကစပြီး စစ်တပ်နဲ့ TNLA တို့ တိုက်ပွဲ စတင်ဖြစ်ပွားခဲ့ရာ လက်ရှိမှာ တောင်းခမ်း တိုက်ပွဲဟာ ၆ လကျော်ကြာ ရှိနေပြီ ဖြစ်ပါတယ်။
စစ်တပ်ဘက်က တောင်းခမ်းတိုက်ပွဲနဲ့ ပတ်သက်ပြီး တစ်စုံတစ်ရာ ထုတ်ပြန်ထားတာ မရှိသေးသလို TNLA ကလည်း ပြီးခဲ့တဲ့ ၂၀၂၄ ခုနှစ် နိုဝင်ဘာလနောက်ပိုင်း တိုက်ပွဲသတင်းတွေ ထုတ်ပြန်ထားတာ မတွေ့ရတော့ပါဘူး။
စစ်ကောင်စီကို ထောက်ခံတဲ့ တယ်လီဂရမ်ချန်နယ်တွေမှာတော့ တောင်းခမ်းတိုက်ပွဲမှာ စစ်ကောင်စီရဲ့ ဒရုန်းတိုက်ခိုက်မှု ရုပ်သံတွေ မကြာခဏ ဖော်ပြနေတာ တွေ့ရပါတယ်။
နောင်ချိုမြို့ကို TNLA က ပြီးခဲ့တဲ့ ၂ဝ၂၄ ဇူလိုင် ၁၀ ရက်မှာ တိုက်ခိုက်သိမ်းပိုက်ပြီး ထိန်းချုပ်ထားတာ ဖြစ်ပါတယ်။
