ရွှေဖီမြေ၊ ဖေဖော်ဝါရီ ၂၈ ရက်၊ နောင်ချို
တအာင်းတပ်- TNLA ထိန်းချုပ်ထားတဲ့ ရှမ်းမြောက် နောင်ချိုမြို့နယ် ရွှေမုဌောရွာကို စစ်ကောင်စီတပ်က လေကြောင်းနဲ့ ၂ ကြိမ် ထပ်မံ တိုက်ခိုက်ခဲ့တာကြောင့် သီလရှင်တစ်ပါး ဒဏ်ရာ ရတာအပြင် နေအိမ် ၅ လုံးလည်း ပျက်စီးခဲ့ပါတယ်။
ဒီနေ့ ဖေဖော်ဝါရီ ၂၈ ရက် နေ့လယ် ၃ နာရီ ဝန်းကျင်မှာ MiG-29 နဲ့ ဂျက်ဖိုက်တာ အသုံးပြုပြီး ၂ ကြိမ် ဗုံးကြဲချ တိုက်ခိုက်ခဲ့တာ ဖြစ်ပါတယ်။
အလားတူ ပြီးခဲ့တဲ့ ဖေဖော်ဝါရီ ၂၄ ရက်နဲ့ ၂၅ ရက်ကလည်း ရှမ်းမြောက် နောင်ချိုမြို့နယ် အုမ္မတီးရွာကို လေကြောင်းနဲ့ ဗုံးကြဲတိုက်ခိုက်ခဲ့လို့ အရပ်သားနေအိမ်တွေ ပျက်စီးခဲ့ပါတယ်။
ဖေဖော်ဝါရီ ၂၃ ရက်ကလည်း နောင်ချိုမြို့နယ် တောင်ရှည်နဲ့ မန်မော်ရွာကြား စစ်တပ်နဲ့ TNLA တို့ တိုက်ပွဲ ဖြစ်ပွားချိန် စစ်ကောင်စီတပ်က အဆိပ်ငွေ့ဗုံး ကြဲချတိုက်ခိုက်ခဲ့တာကြောင့် TNLA တပ်သား ၁၀ ဦး ထိခိုက်ဒဏ်ရာ ရခဲ့တယ်လို့ TNLA က ထုတ်ပြန်ထားပါတယ်။
စစ်တပ်နဲ့ TNLA ရဲ့ ဆွေးနွေးပွဲရလဒ် မထွက်ဘဲ ပြီးဆုံးပြီးနောက် စစ်ကောင်စီတပ်ဟာ TNLA ထိန်းချုပ်ဒေသကို မြေပြင်ကနေ ထိုးစစ်ဆင်နေသလို လေကြောင်း တိုက်ခိုက်မှုလည်း မကြာခဏ ပြုလုပ်လာနေပါတယ်။
ပြီးခဲ့တဲ့ ဖေဖော်ဝါရီ ၁၇ ရက်ကနေ ဖေဖော်ဝါရီ ၂၂ ရက်အထိ TNLA ထိန်းချုပ်ထားတဲ့ နမ္မတူ၊ နောင်ချိုနဲ့ မိုးမိတ်မြို့နယ်မှာ လေကြောင်း တိုက်ခိုက်မှုကြောင့် သေဆုံးသူ ၇ ဦးနဲ့ ဒဏ်ရာရသူ ၁၈ ဦးအထိ ရှိခဲ့ပါတယ်။
