ရွှေဖီမြေ၊ ဇန်နဝါရီ ၃၀ ရက်၊ မူဆယ်
ရှမ်းမြောက် မူဆယ်မြို့နယ် နမ့်ဟွယ်ကျေးရွာက အမျိုးသားတစ်ဦး မိုင်းနင်းမိပြီး ခြေထောက်တစ်ဖက် ပြတ်ထွက်သွားခဲ့တယ်လို့ TNLA က ထုတ်ပြန်ထားပါတယ်။
ဖြစ်စဥ်ဟာ ပြီးခဲ့တဲ့ ဇန်နဝါရီ ၂၇ ရက် မနက် ၈ နာရီဝန်းကျင်မှာ ကြံခင်းသို့ သွားနေချိန် စစ်တပ်ရဲ့ လက်ကျန် မြေမြှုပ်မိုင်းကို နင်းမိခဲ့တာလို့ ဆိုပါတယ်။
မိုင်းနင်းမိတဲ့ အမျိုးသားဟာ အသက် ၃၀ နှစ်အရွယ် ဦးဟိန်းဇော်ဌေးဆိုသူဖြစ်ပြီး ၎င်းရဲ့ ဘယ်ခြေထောက် ပြတ်ထွက်ပြီး ခန္ဓာကိုယ်နဲ့ လက်နှစ်ဖက်စလုံး ဒဏ်ရာ အပြင်းအထန် ရရှိခဲ့ပါတယ်။
အလားတူ ပြီးခဲ့တဲ့ ဇန်နဝါရီ ၁ ရက်ကလည်း မူဆယ်မြို့နယ် ပန်လုံကျေးရွာက ဦးနောင်ဆိုင်ဆိုသူလည်း ရွာအနီးတဝိုက်က တောမှာ ထင်းသွားခွေရင်း မိုင်းနင်းမိခဲ့ပါတယ်။
ဇန်နဝါရီ ၂၂ ရက်မှာလည်း သီပေါမြို့နယ် မန်ကောင်းရွာမှာရှိတဲ့ အမျိုးသားတစ်ဦး မိုင်းနင်းမိပြီး လက်ချောင်း ပြတ်ခဲ့ပါတယ်။
ရှမ်းမြောက်က နေရာအများစုမှာ တိုက်ပွဲ ဖြစ်ပွားတာ မရှိတော့ပေမဲ့ တိုက်ပွဲအတွင်းက လက်ကျန် မိုင်းကြောင့် ဒေသခံတွေ မကြာခဏ မိုင်း နင်းမိနေပါတယ်။
