ပို့လဘား၊ ဖေဖော်ဝါရီ ၄ ရက်၊ မူဆယ်
ရှမ်းမြောက် တရုတ်-မြန်မာနယ်စပ်ဖြစ်တဲ့ မူဆယ်မြို့မှာ အမျိုးသားတစ်ဦး ရေနွေးတည်ချိုးရာကနေ ဓာတ်လိုက်ပြီး သေဆုံးသွားခဲ့တယ်လို့ ရွှေဖီမြေက စုံစမ်းသိရှိရပါတယ်။
မနေ့ ဖေဖော်ဝါရီ ၃ ရက် မနက် ၇ နာရီဝန်းကျင်မှာ မူဆယ်မြို့ စက်မှုဇုန်မှာ နေထိုင်တဲ့ အမျိုးသားတစ်ဦး ရေချိုးရာကနေ ဓာတ်လိုက်ပြီး သေဆုံးခဲ့တာလို့ မေတ္တာပန်းခင်း ပရဟိတအသင်းတစ်ဦးက ရွှေဖီမြေကို ပြောပါတယ်။
“သူက ရေချိုးပြီး အလုပ်သွားလုပ်မှာပေါ့။ ရေပူလျှပ်စစ် မီးပူကွေးနဲ့ ရေသယ်ပြီး ချိုးနေတာ။ ဘယ်ကနေ ဘယ်လိုဖြစ်သွားလဲတော့ မသိဘူး။ သူ့လက်က ရေကိုင်လို့ ဓာတ်လိုက်သွားတာလား ကြိုးကိုင်လို့ ဓာတ်လိုက် သေသွားတာလား ကျနော်တို့လည်း မသိရဘူး ကလေးဆိုတော့လေ”
ဓာတ်လိုက်ပြီး သေဆုံးသွားတဲ့ အမျိုးသားဟာ အသက် ၁၇ နှစ်အရွယ်ရှိတဲ့ စိုင်းအောင်မိန်းဖြစ်တယ်လို့ ဆိုပါတယ်။
မူဆယ်မြို့မှာ အခုလို ဓာတ်လိုက်သေဆုံးတာ မကြာခဏ ကြုံနေရတာကြောင့် တရုတ်ကနေ တင်သွင်းတဲ့ ရေပူလျှပ်စစ် မီးပူကွေးတွေ မသုံးကြဖို့ အဆိုပါအမျိုးသားက တိုက်တွန်းထားပါတယ်။
