မိုင်းရူပ၊ ဧပြီ ၂၈ ရက်၊ လားရှိုး
စစ်ကောင်စီတပ် ပြန်အုပ်ချုပ်နေတဲ့ ရှမ်းမြောက် လားရှိုးမြို့မှာ လုယက်မှု ၂ ခုထပ်မံဖြစ်ပွားခဲ့ပြီး ၂ ဦးဒဏ်ရာရခဲ့တယ်လို့ ဒေသခံတွေက ရွှေဖီမြေကို ပြောပါတယ်။
ဒီနေ့ ဧပြီ ၁၄ ရက် မနက် ၄ နာရီမှာ အမျိုးသားတစ်ဦးဟာ ၎င်းရဲ့ ဇနီးဖြစ်သူကို လားရှိုးစျေးသို့ ပို့ဆောင်ပြီး ပြန်လာစဥ်ရပ်ကွက်-၅ အနီးရှိ ပန်အုပ်ကျောင်းမှာ လူအုပ်တစ်စုရဲ့ ဝိုင်းရိုက်တာခံပြီး ဆိုင်ကယ်ကို လုယက်သွားခဲ့ပါတယ်။
“မနက်မှာ ဈေးသွားခင်းဖို့ သူ့ယောကျ်ားက သူ့မိန်းမကိုဈေးခင်းသွားပို့ပြီးအပြန်လူ(၅)ယောက်က ဝိုင်းရိုက်တာ။ ဆိုင်ကယ်လုသွားတယ်” လို့ လုယက်ခံရသူနဲ့ နီးစပ်သူတစ်ဦးက ရွှေဖီမြေကို ပြောပါတယ်။
ဒါ့အပြင် ဒီနေ့မနက်အစောပိုင်း မနက် ၄ နာရီမှာ လားရှိုးစျေးမှာ ကြက်သားတင်သွားတဲ့ အမျိုးသမီးတစ်ဦးက လားရှိုးမြို့ ရပ်ကွက်-၂ မှာ လူတစ်စုရဲ့ ဓားခုတ်တာခံရပြီး ၎င်းတင်လာတဲ့ ကြက်သားတွေကို လုယူသွားတယ်လို့ ရွှေဖီမြေက စုံစမ်းသိရှိရပါတယ်။
လက်ရှိ လားရှိုးမှာ စစ်ကောင်စီတပ်ဘက်က အုပ်ချုပ်ရေးယန္တရားတွေ မလည်ပတ်နိုင်သေးဘဲ ၎င်းတို့တပ်စွဲမယ့် နေရာတွေကိုသာ ပြင်ဆင်နေတယ်လို့ ဒေသခံတွေက ပြောပါတယ်။
ပြီးခဲ့တဲ့ ဧပြီ ၂၆ ရက် ည ၇ နာရီ ဝန်းကျင်မှာ လားရှိုးမြို့ ရပ်ကွက် ၉၊ နယ်မြေ ၁၊ လမ်းသွယ် ၁၀ မှာ နေထိုင်တဲ့ ဦးမောင်ဆိုတဲ့ နေအိမ်ထဲကို ဓားပြတစ်စုကဝင်ပြီး ၎င်းအမျိုးသားရဲ့ ဦးခေါင်းနဲ့လက်ကို ဓားနဲ့ခုတ်ခဲ့လို့ သေဆုံးသွားခဲ့ပါတယ်။
လားရှိုးကို စစ်ကောင်စီတပ်က ဝင်ရောက်ပြီးနောက် ပြီးခဲ့တဲ့ ဧပြီ ၂၂ ရက်ကနေ ဒီနေ့ ဧပြီ ၂၈ ရက်အထိ ဓားပြတိုက်မှု၊ ဓားခုတ်မှု၊ လူယှက်မှု ၈ ကြိမ်အထိ ဖြစ်ပွားခဲ့ပါတယ်။
တရုတ်ရဲ့ ကြားဝင်စေ့စပ်မှုနဲ့ စစ်ကောင်စီနဲ့ MNDAA အကြား အပစ်ရပ်ဖို့ သဘောတူခဲ့ပြီးနောက်ကိုးကန့်တပ်ဟာ လားရှိုးမြို့ကနေ ပြီးခဲ့တဲ့ ဧပြီ ၂၁ ရက် ထွက်ခွာခဲ့ရပြီး စစ်ကောင်စီရဲ့ အုပ်ချုပ်ရေးယန္တရား ဝင်ရောက်လည်ပတ်မှာ ဖြစ်ပါတယ်။
စစ်ကောင်စီရဲ့ အရှေ့မြောက်တိုင်းစစ်ဌာနချုပ် အခြေစိုက်ရာ လားရှိုးမြို့ကို MNDAA နဲ့ နွေဦးတော်လှန်ရေးတပ်တွေက ပူးပေါင်းပြီး ပြီးခဲ့တဲ့ ၂၀၂၄ ခုနှစ် သြဂုတ် ၃ ရက်မှာ တိုက်ခိုက်သိမ်းပိုက်ထားပြီး ၈ လကျော်အကြာမှာ စစ်ကောင်စီကို ပြန်လည်လွှဲပြောင်းပေးခဲ့ရတာ ဖြစ်ပါတယ်။
