ယာရူစိင်၊ မေလ ၅ ရက်၊ လားရှိုး
ရှမ်းမြောက် လားရှိုးမြို့သိမ်း တိုက်ပွဲအတွင်း သေဆုံးသွားခဲ့တဲ့ လူတွေအတွက် ရည်စူးပြီး မန်ဆူကျောင်းဆရာတော်ကိုယ်တိုင် ဦးဆောင်ကာ စစ်ကောင်စီတပ်တို့ပူးပေါင်းပြီး ရပ်ကွက်အချို့ထဲ ပရိတ်ရွတ်ပေးခဲ့တယ်လို့ ရွှေဖီမြေက စုံစမ်းသိရပါတယ်။
မနေ့ မေလ ၄ ရက် ညနေ ၄ နာရီအချိန်မှာ မန်ဆူကျောင်းဆရာတော်ကိုယ်တိုင် ဦးဆောင်ပြီး မြို့ပေါ်ရပ်ကွက်တွေမှာ အန္တရာယ်ကင်း ပရိတ်လိုက်ရွတ်ပေးခဲ့တာဖြစ်တယ်လို့ လားရှိုးမြို့ခံ တစ်ဦးက ရွှေဖီမြေကို ပြောပါတယ်။
“ဗုဒ္ဓဘာသာအရပြောရမယ်ဆိုရင် စစ်ဖြစ်နေတုန်းက လူသေအလောင်းတွေ တအားများတယ်လေနော်။ ပြည်သူတွေ သေတာလဲ ရှိတယ်။ စစ်တပ်ဘက်ကလဲ သေတာလဲရှိသလို လက်နက်ကိုင်တော်လှန်ရေးတပ်သားတွေ သေတာလဲရှိတယ်လေ။ ရပ်ကွက်ထဲက လမ်းကြားတွေမှာ ပရိတ်ပဌာန်းရွတ်ပေးပြီးတော့ ကုသိုလ်ကောင်းမှုတစ်ခု လုပ်နေတဲ့ပုံစံပေါ့”
အခုလို ပရိတ်ပဌာန်းရွတ်ပေးတာက လာရှိုးမြို့ရှိ လူထုတွေရဲ့ ထောက်ခံအားပေးမှုကို လိုချင်တာဖြစ်တယ်လို့ နောက်ထပ် လားရှိုးမြို့ခံ တစ်ဦးက ပြောပါတယ်။
“ရပ်ကွက်တွေမှာ လူသေထားတာများတယ်လေ။ မကျွတ်သေးပဲ ခြောက်နေသေးတာတွေ ရှိသေးတယ်။ တကယ်တော့ ကိုးကန့်ထိန်းချုပ်ကတည်းက ရပ်ကွက်တွေ တော်တော်များများမှာ ပရိတ်ရွတ် တရားနာတာတွေ လုပ်ခဲ့ပြီးပြီ။ အခုလည်း ထပ်လုပ်တယ်ပေါ့။ အကုန်တော့ မလုပ်ဘူး သူတို့လုပ်ချင်တဲ့ရပ်ကွက်တွေပဲ လိုက်လုပ်သွားတာ”လို့ ဆိုပါတယ်။
ပြီးခဲ့တဲ့ ဧပြီ ၂၂ ရက်က လားရှိုးမြို့ပေါ်ကို စစ်ကောင်စီတပ် ဝင်ရောက်လာပြီးတဲ့နောက် လက်ရှိအချိန်ထိ မြို့ပေါ်ရှိ ပြည်သူ့ဆေးရုံကြီးအပါအဝင် အုပ်ချုပ်ရေးယန္တရားအချို့ စတင်လုပ်ဆောင်နေပြီဖြစ်ကြောင်းကို ဒေသခံတွေ ပြောပြချက်အရ သိရပါတယ်။
လားရှိုးမြို့ကို တရုတ်နိုင်ငံရဲ့ ဝင်ရောက်အကူအညီပေးမှုနဲ့အတူ စစ်ကောင်စီတပ်က ပြန်လည်အုပ်ချုပ်ခွင့် ရရှိသွားခဲ့တာ ဖြစ်ပါတယ်။
