မိုင်းရူပ၊ စက်တင်ဘာ ၃၀ ရက်၊ လားရှိုး
စစ်ကောင်စီတပ်ထိန်းချုပ်ထားတဲ့ ရှမ်းမြောက် လားရှိုးမြို့မှာ မဲဆန္ဒရှင် မဲစာရင်း လာကြည့်ဖို့ စစ်ကောင်စီရဲ့ ရွေးကောက်ပွဲကော်မရှင်က လော်စပီကာနဲ့ မြို့တွင်း လိုက်လံဆော်ဩနေတယ်လို့ လားရှိုးမြို့ခံတွေက ပြောပါတယ်။
စစ်ကောင်စီဦးဆောင် ကျင်းပမယ့် ရွေးကောက်ပွဲမှာ မဲပေးနိုင်တဲ့ မဲဆန္ဒရှင်စာရင်းတွေကို ရပ်ကွက်ရုံးတွေမှာ ကပ်ထားပြီး မပျက်မကွက် လာကြည့်ဖို့ လော်စပီကာနဲ့ လိုက်လံ သတိပေးနေတယ်လို့ ဆိုပါတယ်။
“လားရှိုးတစ်မြို့လုံး ပတ်အော်နေတာ၊ လော်စပီကာနဲ့လေ။ မဲစာရင်းတွေကို ရပ်ကွက်ရုံးတွေမှာ ကပ်ထားမယ်ပေါ့။ ဘယ်သူမှလည်း စိတ်မဝင်စားဘူး” လို့ လားရှိုးမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
လားရှိုးမြို့မှာ ဝင်ရောက်ယှဉ်ပြိုင်မယ့် ပါတီထဲမှာ စစ်တပ်ရဲ့ ကြံ့ခိုင်ရေးနှင့် ဖွံ့ဖြိုးရေးပါတီ- USDP၊ ရှမ်းနှင့် တိုင်းရင်းသားများဒီမိုကရက်တစ်ပါတီ- SNDP နဲ့ ပြည်သူ့ရှေ့ဆောင်ပါတီ- PPP စတဲ့ ပါတီတွေပါဝင်တယ်လို့ သိရပါတယ်။
ဒါပေမယ့် ပါတီတချို့မှာ လက်ရှိအချိန်အထိ ဝင်ပြိုင်မယ့် ကိုယ်စားလှယ်လောင်းတွေ မရသေးဘဲ ဆက်လက် ရှာဖွေနေကြောင်း နောက်ထပ် လားရှိုး ဒေသခံ တစ်ဦးက ဆိုပါတယ်။
စစ်ကောင်စီ ကျင်းပမယ့် ရွေးကောက်ပွဲ အပိုင်း-၁ မှာ မဲဆန္ဒရှင်တွေရဲ့ စာရင်းကို ဒီနေ့ စက်တင်ဘာ ၃၀ ရက် ကနေ အောက်တိုဘာ ၁၄ ရက်အထိ သက်ဆိုင်ရာ ရပ်ကွက်တွေမှာ ကပ်ထားမယ်လို့ စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ထားပါတယ်။
စစ်ကောင်စီတပ် ဦးဆောင်ကျင်းပမယ့် ရွေးကောက်ပွဲ ပထမအပိုင်းကို လာမယ့် ဒီဇင်ဘာ ၂၈ ရက်မှာ မြို့နယ်ပေါင်း ၁၀၂ မြို့မှာ စတင်ပြုလုပ်မှာဖြစ်ပြီး အပိုင်း ၃ ပိုင်းနဲ့ ကျင်းပသွားမယ်လို့ စစ်ကောင်စီရဲ့ ရွေးကောက်ပွဲကော်မရှင်က ထုတ်ပြန်ထားပါတယ်။
ရှမ်းမြောက် မူဆယ်၊ နောင်ချိုနဲ့ လားရှိုးမြို့တွေကို ရွေးကောက်ပွဲ ပထမအပိုင်း ကျင်းပမယ့် နယ်မြေတွေထဲ စစ်ကောင်စီက ထည့်သွင်းထားပါတယ်။
အမျိုးသားညီညွတ်ရေးအစိုးရ- NUG အပါအဝင် တော်လှန်ရေးအင်အားစုတွေကတော့ စစ်ကောင်စီ ကျင်းပမယ့် ရွေးကောက်ပွဲကို အသိအမှတ် မပြုကြောင်း ထုတ်ဖော်ပြောဆိုထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
